Росси гүрэн дотор декабриин 9-дэ Эхэ ороной Баатарнуудай үдэр үргэн дэлисэтэйгээр тэмдэглэгдэдэг. Гүрэнэй хүндэтэ шангуудта - Советскэ Союзай болон Ородой Холбоото Уласай Баатарнуудай, Святой Георгиин болон Алдар Солын орденуудай кавалернуудай үндэр нэрэ зэргэнүүдтэ хүртэһэн Баатарнууд энэ дурасхаалта үдэр ёһолол хайрада хүртэдэг гээшэ. 

1Зула

Агууехэ Эсэгын дайнай байлдаанда, Афганистанай болон Хойто Кавказай халуун газарнуудта гэдэргээ сухарингүй, эрэлхэг зориг харуулһан баатарнуудаа, мүн Агын Буряадай тойрогой, бүхыдөө хизаарай болон гүрэн түрын хүдөө ажахын, үйлэдбэриин, эрдэмэй, соёлой, тамирай оршомуудаар шударгы бэрхээр, “хамсыгаа шаман” ажаллажа, хүгжэлтэдэнь сэгнэшэгүй ехэ хубитаяа оруулһан баатарнуудаа мүнхэлхэ зорилготойгоор Агын Баатарнуудай Хүшөө 2010 оной майн 5-да Ага тосхондо бодхоогдоһон юм.

Агын тойрогһоо Эсэгэ ороноо хамгаалхаяа 5860 хүбүүд, басагад мордоһон юм: таряашад, малшад, багшанар, аргашад, ангуушад болон барилгашад – нэгэ үгөөр Агын сэрэгшэд. Тэдэнэй 2793-иинь байлдаанай гал дүлэтэ газар тэбэрин, алдалан унаһаниинь харамтай. Нютагаймнай сэрэгшэд ами наһаяа хайрлангүй тэмсэжэ, дайнай газарта мэргэн буудагшад болон эрхим тагнуулшад, пехотинцүүд болон танкистнүүд, сапёрнууд болон артиллеристнүүд, лётчигууд болон эмшэд гээд суурхаһан юм.

Дайшалхы аша габьяагай түлөө  олон хүбүүднай гүрэнэй үндэр нэрэ зэргэнүүдтэ, шан хайрануудта хүртэһэн, орден медальнуудаар шагнагдаһан.  Базар Ринчино, Александр Парадович хоёр Советскэ Союзай Баатарай нэрэ зэргэдэ хүртэһэн. “Спартак” партизануудай отрядай ротын командир, Алхана нютагай Бадма Жабон дайсадтай эрэлхэгээр тэмсэһэнэй түлөө Ородой Холбоото Уласай Баатар болоһон юм. 

Ерээдүй руу холые шэртэн, бидэндэ амгалан тайбан, дайн дажаргүй байдал асарһан аха захатанайнгаа баатаршалга хододоо һанажа ябаха, ургажа ябаа залуу үетэндөө жэшээ болгон харуулха гээшэ – манай сэхэ уялга мүн болоно.

Үбэр Байгалай хизаараар буряад соёл хүгжөөлгын түб Агын Баатарнуудай Хүшөөдэ хүндэтэ һуурияа эзэлһэн Баатарнууд тухай презентаци бэлдэбэ. Һонирхон харахыетнай уринабди!

https://docs.google.com/presentation/d/1p1pdnDx4flhkOKpYn--G30FjFK1DsPy1pHRo2awZeXk/edit?usp=sharing

 

.