СССР-эй арадай артист Л.Л.Линховоиной нэрэмжэтэ дуушадай уласхоорондын мүрысөө угтуулан, Үбэр Байгалай хизаараар буряад соёл хүгжөөлгын түбэй мэргэжэлтэн Хандама Мункуева Агын Буряадай автономито тойрогой соёлой габьяата хүдэлмэрилэгшэ Любовь Догдомэтэй хөөрэлдөө эмхидхэһэн байна.
Л.Ш.Догдомэ – 24 жэлэй туршада арадай зохёолгын Агын тойрогой түбэй мэргэжэлтэнээр амжалта түгэс хүдэлхэ үедөө тус мүрысөөнэй байгуулгада, мүн хүгжэлтэдэнь горитой хубитаяа оруулһан соёлой ветеран мүн болоно.
- Любовь Шираповна, Лхасаран Линховоиной нэрэмжэтэ мүрысөөнэй эхи үндэһэ табилгада Та “бэеэрээ” хабаадалсаһан хүн байнат. Мүнөө уласхоорондын хэмжээнэй болоод байһан мүрысөөнэй түрүүшын алхамуудынь хөөрэжэ үгыт.
- Агын тойрогой захиргаанай соёлой таһагай эдэбхи үүсхэлээр СССР-эй арадай артист Лхасаран Линховоиной мүнхэ дурасхаалай шангай нээмэл харалга-мүрысөөн тойрог дотор анха түрүүшынхеэ 1988 ондо эмхидхэгдэһэн байна. Тиихэ үедэ тойрогой соёлой таһагай дарга Баир Будаевич Мункожаргалов хүдэлжэ байгаа. Түрүүшын мүрысөөндэ Агын тойрогой болон Улаан-Үдэ хотын, Усть-Ордагай Буряадай автономито тойрогой, Монгол ороной Хэнтэйн аймагай дүн хамта 46 залуу дуушад сугларжа, шанга тулалдаан үнгэрөө бэлэй. Лхасаран Линховоиной тоонто нютаг Ага-Хангилда горитой ажал ябуулагдажа, мүрысөөнэй түрүүшын үдэртэ баяр ёһололой оршон байдалда музей үүдэеэ сэлиһэн байна.
Мүрысөөнэй түрүүшын алхам хэжэ байха үедэ, Буряадай суута дуушад болон артистнар горитой дэмжэлтэ үзүүлээ һэн. Шүүгшэдэй бүлэгэй түрүүлэгшээр СССР-эй арадай артист Ким Базарсадаев, шүүгшэдэй бүлэгэй гэшүүд: Буряад АССР-эй арадай артист Болот Бороев, Буряад АССР-эй габьяата артист Клим Миткинов, Буряад АССР-эй габьяата артист Владимир Буруев, РСФСР-эй соёлой габьяата хүдэлмэрилэгшэ Эдвард Маковский, Буряад АССР-эй арадай артист Д.Л.Линховоина болон бусад дуушадые сэгнэһэн байна.
Эмхидхэлэй хорооной гэшүүд бэлэдхэлгын үедэ ехэ сүлөөгүйнүүд, холо ойроһоо бууһан айлшадые, олон тоото хабаадагшадые угтаха, байрлуулха, хооллуулха, мүрысөөгөө торьдиһогүй һайнаар үнгэргэхэ гээд лэ бидэнэй урда харюусалга горитой байгаа һэн гээд мүнөө һанагшаб. Тиин олоной хүсөөр түрүүшын харалга-мүрысөөн үндэр хэмжээндэ үнгэрөө бэлэй.
Новосибирск хотоһоо урид захигдажа асаруулагдаһан рояль түрүүшын мүрысөөндэ хэрэглэгдээ. Улаан үнгэтэй байжа, тайзан дээрэһээ ехэ зохидоор харагдадаг, айлшад ехэ һонирходог һэн. Тэрэ рояль дээрээ сэсэг табижа гоёохош, Шэтэ хотоһоо роялиин хүгжэмэй абяа тааруулдаг мэргэжэлтэниие урихаш.
Тэрэ үедэ наймаада юумэн ехэ хомор байдаг байгаа. Хабаадагшадаа һайнаар урмашуулхын тула хубсаһа угаадаг машина, гүсэ г.м. байдалай хэрэгсэлнүүдые хото городһоо захижа асаруулаад, илагшадтаа бэлэглэдэг байгаабди. Мүнөө харахада гол түлэб мүнгэн шан барюулагдадаг болонхой, энэнь мүнөөнэй сагта тон таарамжатай гээд һанагшаб.
Хэдэн мүрысөөнүүдтэ би шүүгшэдэй бүлэгэй секретарь ябааб. Жюриин гэшүүдэй хабаадагша бүхэнэй дуугаа гүйсэдхэһэнэй һүүлээр нэгэ жаахан тэбхэрхэн саарһан дээрэ сэгнэлтэ табяад үгэхэдэнь, хамтаруулжа, согсолжо, өөртөө тэмдэглэдэг байгааб. Мүрысөөнэй үедэ тархяаш бодхоохо сүлөөгүй байгша һэм.
Мүнөө Л.Л.Линховоиной нэрэмжэтэ мүрысөө алдангүй харадагби. Хабаадагшад жэлһээ жэлдэ олон боложол байна, Монгол оронһоо талаан бэлигтэй, ирагуу һайхан хоолойтой шанга дуушад ерэдэг. 1994 ондо мүрысөөн Уласхоорондын хэмжээнэй боложо, хабаадагшадай ургалта, хүгжэлтэдэ ниилээдгүй дэмжэлтэ, түлхисэ болодог гээд тэмдэглэхээр. Жэшээнь, Дулдаргын аймагай Зүдхэлиһөө тоонтотой Билигма Ринчиновагай эндэ һая “Ородой холбоото уласай габьяата артист” үндэр нэрэ зэргэдэ хүртэһэндэнь би ехэ урмашааб, баярлааб. Энэл мүрысөөндэ эдэбхитэйгээр хабаадажа, нэгэтэ бэшэ түрүү һуури эзэлһэн талаан бэлигтэй дуушан юм. Үшөө олон хүбүүд басагад хабаадажа, түрэл нютагайнгаа нэрэ дээрэ үргэжэ ябанал даа.
Саашадаа Лхасаран Линховоиной нэрэмжэтэ дуушадай мүрысөөн улам бүри хүгжэжэ, олон тоото эрхим дуушадые элирүүлэн, одото харгыень гэрэлтүүлжэ байхань болтогой гэжэ үреэхэ байнаб.