Үреэлнүүд
Айдар наhанайнгаа зам
Зүбөөр шэлэн залажа,
Юртэмсэ энэ дэлхэйдэ
Шэнэ сагай урасхалаар
Хүсэhэн тээшээ сухарилтагүйгөөр дабшажа,
Эрдэм ухаанай, бэлиг шадабариин,
Ажалай дүршэлэй абьяаста эрмэлзэн,
Үндэр hайхан сэдьхэлтэй ябахатнай болтогой!
Алтан дэлхэйн жама еhоор
Айл боложо түбхинэhэн ушараартнай
Аргагүй ехэ баяраа мэдүүлэн байнабди.
Сэдьхэл зориг hайтай,
Тэнхээ тамир ехэтэй,
Түрэhэн эхэ эсэгэдээ,
Түрэл гарал, садандаа
Түшэг тулга болохоор
Түбшэн даруу зантай айл болооройгты.
Табан хүдэр хүбүүдэй,
Табан илдам басагадай
Түрэлхид боложо жаргаарайгты!
Альган дээрээ үргэhэн
Абаяа hанажа ябаарай
Арадтаа хүндэтэй ябажа,
Ашата гуламтаяа нэрлүүлээрэй!
Альганай шэнээн торгоор
Арбан захатые бүтээдэг
Бэри бууба гэлсүүлээд,
Бэрхэ зандаа ябаарай!
Yшөө олон жэлнүүдтэ
Yндэр һайхан заяатай,
Элүүр энхэ, амгалан
Энэ дэлхэй гэшхыта!
Yдэр бүхэндэ жаргалай һайханиие үзэжэ,
Yглөө бүхэндэ наранай һайханиие хаража,
Yреэлэй һайханиие ходо шагнажа,
Yндэр наһа наһалжа,
Yри хүүгэдтээ туһалжа,
Yетэн нүхэдтөө хүндэтэй,
Yнэр баян һуугыт даа!
Абын эжын үреэлтэй
Аглаг тэнюун нютагтаа
Арюухан hайхан байдалтай
Амгалан hуухатнай болтогой!
Наhан дээрээ
Наhа нэмэжэ байхадаа,
Айл аймагтаа, арад зондоо
Үшөө ута наhа
Удаан жаргал үреэел!
Үри хүүгэднай урагшаа дабшан шармайг,
Үбгэд хүгшэднай буян ехэтэй байг,
Харһамнай эхитэй, халюумнай эхэтэй,
Хайрата Буряаднай хэтэдээ мүнхэ байг!
Буурал ехэ ёһо заншалаймнай
Буурашагүй удхань бүри һэргэг!
Буряад түрэл үндэһэн хэлэнэймнай
Булагынь хэзээдэшье бү шэргэг!
Алдар сэнхир хадагаа барижа,
Алтан дэлхэйдээ сэржэмээ үргэе!
Үбгэн буурал аба эжыгээ хүндэлжэ,
Үглөөнэй элшэ нараар золгое!
Уг гарбалаа уhанда хаянгүй,
Үгэеэ hалхинда хиидхүүлэнгүй,
Үреэлээ үлхэжэ, заяагаа залгажа,
Үеын үедэ мүнхэжэ жаргаяа!!!
Урихан, hайхан hанаатай нютагайм үбгэд,
hахижал тоонтоео мүнхэ hуугыттаа,
Уянхан сэдьхэлтэй нютагайм хүгшэд,
угтажа бидэнээ мүнхэ hуугыт даа,
Тэнюун сэдьхэлтэй нютагайм наhатайшуул,
тойруулан ашанараа, жаргалтай hуугыт даа!!!
Саг жэлэй ошохо бүри,
Сарюун дорюун зандаа,
Залуу доодо үетэндөө
Заабари, hургаал хэлэжэ
Арбан сагаан буянаа үйлэдэжэ,
Амгалан тэнюун hуугыт даа!!!
Үетэн нүхэдтөө илдамхан
Өөр дундаа инагхан ябагты,
Олзо ехэтэй,
Олон хүүгэдтэй бологты!
Гэрээр дүүрэн гэгээн наратай,
Гүсөөр дүүрэн халуухан сайтай,
Табагаар дүүрэн тарган мяхатай,
Талаар дүүрэн табан хушуу малтай,
Табисуур һайта талаантай бэлигтэй,
Эбтэй, эетэй, элүүр энхэ бэетэй,
Зориг хүсэл һайтай,
Зол жаргалтай байхатнай болтогой!
Асатай харгыда төөрингүй,
Ахашуулай зааһаар ябажа,
Арадтаа – алдартай, зондоо – суутай,
Сэдьхэлдээ олон нүхэдтэй,
Сээжэдээ сэсэн зугаатай,
Бэрхэхэн, сэбэрхэн басаган боложо үндыхэшни
болтогой!
Yбэр дээрээ үргэһэн
Эжыгээ һанажа ябаарай.
Эжэлтэй нүхэртэй боложо,
Энхэ түрэеэ нэрлүүлээрэй.
Альган дээрээ үргэһэн
Абаяа һанажа ябаарай,
Арадтаа хүндэтэй ябажа
Ашата гуламтаяа нэрлүүлээрэй.
Ашата Абынгаа
Алдар һайхан нэрые
Олон жэлдэ нэрлүүлжэ,
Омог сарюун ябаналта.
Нангин нэрэ түрыень
Найман зүгөөр үргэжэ,
Арад зоной сэдьхэлдэ
Алтан зула болгоолта.
Ядарал гээшые мэдэнгүй
Ямба хүндэ ехэтэй
Ябахатнай болтогой!
Хүшэр, орёо байдал соо
Харгы замаа алдангүй,
Хүнэй дунда жаргалтай
Хүхюун зандаал ябыт даа!
Айлдаа амараг ябаарай,
Зондоо зохид ябаарай.
Дээрэһээшни бурхан татан ябаг,
Дороһоошни зон үргэн ябаг.
Буурал сагаан үһэн
Толгойдошни байг,
Буян сагаан наһан
Бэедэшни байг.
Аяндаа зөөлэн ябаарай,
Ашанартаа хүндэтэй ябаарай.
Холо ябабал мэндэеэ хүргэлсэн,
Ойро ябабал орожо гаралсан,
Элүүр энхэ, hайн hайхан
Ажал хүдэлмэридээ,
арад зондо хүндэтэй
Хүхюүн зугаатай ябагты!
Балшар бага наhанhаа
Бэлигтэй юрөөл абаарайгты
Дээдэ эрдэмэй hургаалhаа
Дээжынь абажа ябаарайгты!
Холын харгы замда
Хододоо озотой жаргаарайгты
Арад зонойнгоо дундаханань
Алтан тооhондонь ябаарайгты!
Аршалан гамнажа ябаарайгты!
Сэдьхэл зүрхэ уужамтай,
Сэхэ шударгы зантай,
Хонгор hайхан зантай hуугаарайгты!
Ажана амгалан,
Ажалдаа амжалтатай,
Аза талаантай
Ажаhуухатнай болтогой!