Сагаан hарын мэндэ
Жэлэй дүрбэн сагта жэгдэ
hэлгэн байдаг
Жэнхэни буряад дайдымни
уларил гээшэ шэрүүн.
Ууган сагаан үгыень
удхалхынгаа урда тээ
Урдын талын заншалаар
амаршалая түрүүн: Мэндээ!
Саhа бордоhото хүйтэн үбэл
үнгэржэ,
Сагаагаа бариха элдин хаhа
дүтэлбэ гү?
Сахилзын үзүүр саhан дороhоо
бултайжа,
Сагаан hарамнай урин hараяа
хүтэлбэ гү? Мэндээ!
Харалган хүйтэн хагсуу
hалхинай бусахын түлөө,
Хадарган жабар хара зудын
ошохын түлөө,
Халюун хонгор ногоон хабарай
ерэхын түлөө,
Хадын боорёор даллан hууха
ургын түлөө,
Маадайн маараха, малай
түллэхэ хаhын түлөө,
Манхан талаяа магтан дуулаха
хүхын түлөө,
Маряан соохор эхэ тайгын
хүжын түлөө,
Манай түлөө ажаhуудаг эжын
түлөө. Мэндээ!
Дүшэн залаа ногооной
шэмэ шүүhэн –
Дүлэтэн байгаа
духаряагаймнай дуhал бүхэн
Амитан зоной хэтэ сагhаа
амсан hууhан
Ажалайнь амта хату арза
байhан гэхэл. Мэндээ!
Адуу мал, хони хурьгыемнай
атаржуулха хэшэгтэй,
Агуу соло, амгалан байдал
бэлэглэхэ хүсэтэй,
Арбай таряа нюрган дээрээ
долгисуулха шэдитэй,
Арад түмэнэй ажалша гар –
ашата сагаан түшэгтэй
Аглаг ехэ дайдадаа арзынгаа
дээжэ сүршөөд,
Аяар холын газарhаа
амаршалан морилhон
Алтарма үhэтэй, тунгалаг
нюдэтэй айлшандаа,
Алда хадаг дээрэ мүнхын
духаряа бариял даа! Мэндээ!
Анха урдынгаа нангин ёhо
дэбжүүлэе,
Адха адхаар ая гангаяа
суглуулая,
Айл айлаар арюун хангалынь
тунаг лэ
Ажабайдалай hүлдэ түхөөн
шатаг лэ!
Дондок Ульзытуев.
Амгалан жэл оршог лэ!
… Номын ёһоор эрхэеэ абан,
Нохой жэлнай эрьен морилбо,
Нарин шангаар зарлиг табин,
Намтараа эхилжэ оробо…
Мэндэ амар, Сагаа һарамнай!
Мүнхэ зулаяа бадаруулбаш.
Буряад арадай бурхан дэлгэн,
Буян хэшэгэй һүлдэ заяабал.
Бүхы зоной шарайе сэнгүүлэн,
Бүгэдэндэ наһа нэмэн үршөөбэш.
Намдашье нэгэ наһа нэмэжэ,
Нарин ябахын номнол айлдабаш –
Хүрэжэ ерэһэн Нохой жэлээ
Хүндэлжэ сахиха захяа үгэбэш.
Сагаа һараар нүхэд золгоноб,
Сай бариит, айлшан болыт гэнэб.
Сагаалганаар амаршалан дохиноб,
Сагаан эдеэнэй дээжэ үргэнэб.
Һаншаг сагаан наһажаал зомнай
Һамын хуралда һууряа эзэлжэ,
Һанаан сэдьхэл, абари замнай
Һайхан бодол түхөөн бүхэжэг лэ!
Арсалан Жамбалон.
Сагаалганаар золгоноб!
…Алтан үлгы Агынгаа
Аглан тэнюун хойморто
Аба эжы хоёройнгоо
Ами олгоhон урмандань,
Ажалша, малша арадтаяа
Алдын хадагаар золголсон,
Аша буянай үршөөлтэй
Алдар солоор үреэнэб!
Yндэр ехэ наhатанай
Yльгэр жэшээ дэлгэрэг лэ!
Yнэн хэрэг үреэл болон,
Yеын - үедэ амгалан hууял!
Эдир хүүгэд замаа олон,
Эрдэмэй оройе дабаг лэ!
Арад ниитэ эб нэгэтэй,
Арюун замаар амар жаргаг лэ!
Ажал, хэрэгүүд бүтэсэтэй,
Амжалта түгэс суурхаг лэ!
Нютаг, оромнай бэхижэн,
Нэрэ, солотой хүгжэг лэ!
Саhан хэшэг дэнзэтэй
Сагаан hарамнай оршомой,
Сагаан hараар, мэндэ амар!
Сагаалганаар амаршалая!
Арсалан Жамбалон.
Сагаалган
Сагаан саhаар сахилзаhаар
Сагаан hара морилбол даа.
Сагынь болоод, салгидаhаар
Сагаан эдеэн дэлгэрбэл даа.
Сагаан хуhан сэргэдэмнай
Сагаалгамнай ерээд буугаа.
Сагаан сэдьхэлhээ бэе бэеэ
Сагаалганаар золгоёл даа.
- Мэндээ!
Буряадаймнай урдын заншал
Бусаад, одоо бурьялба лэ.
Хүхюун омог баяр зугаа
Хүнэй зосоо орьёлбо лэ.
Арад зомнай жаргалтай байг.
Адуу малнай арбинтай байг,
Хүбүүд, басагад бэлигтэй байг.
Хүгшэд үбгэд буянтай байг!
Гунга Чимитов.
Сагаан hарын мэндэ!
Саяан уулын орой дээгүүр
Сагаан саhаар дугы хэhээр
Салуу үргэн Буряадтамнай
Сагаан hара хүрөөд ерээ.
Сарюун дорюун үбгэд, хүгшэд,
Сасуу олон үеын нүхэд,
Сагаан hарын амар мэндэ!
Сарюун, дорюун үбгэд, хүгшэд,
Сасуу олон үеын нүхэд,
Сагаалганай баяр мэндэ!
Шэжэр мүшэн арюун замаар
Шэмээтэйгээр омог янзаар
Шэнхинэмэ хүгжэм дэлгээд
Шэнэ жэлнай мандан гараа.
Сарюун дорюун үбгэд, хүгшэд,
Сасуу олон үеын нүхэд,
Сагаан hарын амар мэндэ!
Сарюун, дорюун үбгэд, хүгшэд,
Сасуу олон үеын нүхэд,
Сагаалганай баяр мэндэ!
Арад зондоо Сагаан hара
Аза жаргал юрөөгөөл даа.
Нэрэ солынь магтан үргөөд,
Нэгэ наhа нэмээгээл даа.
Сарюун дорюун үбгэд, хүгшэд,
Сасуу олон үеын нүхэд,
Сагаан hарын амар мэндэ!
Сарюун, дорюун үбгэд, хүгшэд,
Сасуу олон үеын нүхэд,
Сагаалганай баяр мэндэ!
Гунга Чимитов.
Сагаан хэшэгээр, Сагаалганаар!
Зулай сагаан Саяанһаа
Зурын залгаа хушуураад,
Мүнгэн үрэжэл талаараа
Мянган зоноо жаргуулаад,
Һайхан юм даа, Буряаднай,
Һаруул эхэ нютагнай.
Шэнэ жэлээр,
Шэнын нэгэнээр, Сагаан һараар,
Сагаалганаар,
Амар мэндэ-ээ, амар мэндэ-ээ!
Буурал һамбай Байгалһаа
Уурал надхан сайбалзаад,
Баян дэлгэр зоноороо
Майдар жаргал угталсаад,
Золтойл байна даа, Буряаднай,
Зулгы тэнюун тоонтомнай.
Мүнхэ наһаар,
Мүнгэн һараар,
Сагаан хэшэгээр,
Сагаалганаар,
Амар мэндэ-ээ, амар мэндэ-ээ!
Наян нахид дабаанһаа
Найган угтан харгылаад,
Налгай сарюун хүүгэдээр
Наада найраа наяргаад,
Буянтайл даа, Буряаднай,
Бунхан сэнхир үлгымнай.
Сахюурдамал
Сагаан замаар
Сагаан зангаар,
Сагаалганаар,
Амар мэндэ-ээ, амар мэндэ-ээ!
Матвей Чойбонов.
Сагаалган
Сагаан һарамнайшье бултайба,
Сархат эдеэгээ дэлгээд,
Сагаан үбгэн буубал даа,
Сан, хэнгэрэг нэергээд.
Түбэд, Хитад, Монголоор
Түергэн ерээ ха гү,
Түрэл тоонто – Буряадтам
Түшэмэл найраа дэлгээ гү.
Ажалшан арад, малшад
Альган дээрээ бүүбэйлээ,
Сагаан һара, Сагаалгамнай! – гээд,
Сэржэм дээжээр үреэлээ.
Далай лама, Рэмбуучиин,
Дзанабазар, Миларайбын
Һанан, һахин, тахин ябаһан
Һаруул найрынь ха юм даа.
Сагаан һарамнай сахюуса, наншадаар,
Салгисан дэлгэрэн буубал даа,
Сагаан һарамнай наһандамнай
Сан табижа, «Жэл» сардаа…
Бурхан үршөөг, бүхы юумэн
Бүтэн жэлдээ амгалан байг!
Сагаан һараар Буряадаа,
Сагаан хэшэгээр эжынэрээ,
Сагай һайнаар аханараа.
Сарюун омог дүүнэрээ
Сагаан сэдьхэлһээ амаршалжа,
Сагаахан хадаг барюулһайб даа.
Матвей Чойбонов.
Морилбо
Сагаан һарамнай
Сарюун дайдадаа морилбо.
Сагаан жабараар
Самнан, манаран морилбо,
Мэндээ, сагаан һара!
Сагаалганаа
Асаран, буулган морилбо.
Саһа бордоһоо
Сасан хиисхэн морилбо,
Мэндээ, сагаалган!
Сагаан мүнгөөрөө
Сахилан, яларан морилбо.
Нэгэ наһа
Нэмээн, түхөөн морилбо,
Мэндээ, зон нүхэд!
Эрдэни Дугаров.
Yреэнэл…
Хүбшын мүнгэн ордонhоо
Саhа бордоhо hэгсэрhээр,
Сагаан hара сарюухан
Сагаан замдаа гарана.
Орон дэлхэйн буурал үбгэд,
Эхэ дайдын хатан эжынэр
Ошоhон жэлээ үдэшөөд,
Ерэhэн жэлээ үреэнэл.
Эртын мэндэ хүндэтэй,
Сагаан эдеэгээр сүршэhөөр,
Сагаан hара арюухан,
Сагаалганаа асарна.
Орон дэлхэйн буурал үбгэд,
Эхэ дайдын хатан эжынэр
Ошоhон жэлээ үдэшөөд,
Ерэhэн жэлээ үреэнэл.
Үбгэд, хүгшэд, хүүгэдтэ
Сагаан сэдьхэлээр мүндэлhөөр,
Сагаан hара арюудхан,
Заяа дээрэ болгоно.
Орон дэлхэйн буурал үбгэд
Эхэ дайдын хатан эжынэр
Ошоhон жэлээ үдэшөөд,
Ерэhэн жэлээ үреэнэл.
Эрдэни Дугаров.
Сагаалганай үглөөгүүр
Сагаалганай үглөөгүүр
Саадахи наадахигүйхэн
Бүхэ гэгшээр унтажа,
Бууяхадажа хэбтэтэрни,
Хүгшэн эжым һэрюулбэ.
Хүнжэл уруугаа бухаад,
Дуурд, дуурдхан гэһээр,
Дахин унтахымни тэндэ
Хүнжэлым хуура татан,
Хүгшэн эжым гэмэрбэ:
«Бодо, бодожо ядаһаар,
Yхөөшэдэй тоодо орохош.
Одоо тиигээ гээшэ һаа,
Yе наһандаа өөдэлхэгүйш.
Бодо гэнэм, жаалдамар,
Yтэр нюур гараа угаа».
Сагаалган һэмнай гэжэ,
Гэнтэ ухаандам ороод,
Солбон түргөөр бодоод,
Гар нюураа угаагаад,
Хүгшэн эжынгээ хөөрөөе
Хүсэд соохононь һанабаб:
«Шэнын нэгэнэй үүрээр
Шэмэг одото огторгойһоо
Һама Сахюусан заяархан,
Һэриһэн дэлхэйдэ заларжа,
Найдал дүүрэн сэдьхэлтэй,
Нюдэ сабшаха зуурахан
Дэлхэйе гурба тойрожо,
Дунда түбиин зониие
Дүн бултыень бүридхэн,
Унтажа хэбтээшэдыень
Yхөөшэд тээшэ тооложо,
Угтажа байгаашадыень
Амиды тээшэнь тооложо,
Шэдитэ эрхеэрээ адислаад,
Ашата жаргал үршөөгөөд,
Буянта хэрэгээ бүтээжэ,
Бурханайнгаа орон бусанал».
Һама Сахюусанда үзэгдэжэ,
Yхөөшэдэй тоодо ороогүйдөө,
Һайхан һанаа һаналжа,
Һама Сахюусандаа мүргэнэб.
Эрдэни Дугаров.
Сагаалган тухай шүлэг
Сагаа hарын баяр –
Сагаалган тухай шүлэг
Бэшэжэ түүрээхэ гээшэ
Бэлгэ тэмдэг мэтэ…
Буурай холоhоо ерэhэн
Буряад ёhоо дурдаа бол.
Амгалан тэнюун байдал
Арюудхан мүнхэ үршөөдэг
Һама сахюусан үүрээр
Алтан дэлхэйдэ буужа,
Модон нохой жэлээ
Одон болгожо үдэшөөд,
Модон гахай жэлээ
Тодон мүнөө бэлэглээд,
Газар түбиеэ эрьежэ,
Гурба дахин гороолжо:
- Амитан зон бүгэдөөрэн
Амгалан номгон байдалтай
Амар мэндэ hуугты! – гэн,
Алас тэнгэридээ мордолой…
Гэрэлтэ сарюун заншалаараа
Гэр байраяа сэбэрлэжэ,
Бурхан шүтөөнөө тахижа,
Бадараан зулаа барижа,
Арюун сагаан сэдьхэлээр
Айл аймагтаа ябалсажа:
- Дааган далантай гү,
Буруу булшантай гү? – гэжэ
Амар мэндэеэ хэлсээд,
Алда хадагаа дэлгэнхэй
Аха захатанаа золгоод,
Сарюун энхэ hайндэр –
Сагаалганаа угтан жарганабди…
Шэнэ гараhан жэлдэ
Сагаан урин сэдьхэлтэй,
Сагаан эдеэн хэшэгтэй,
Нэгэ наhа нэмэжэ,
Сагаан hайхан харгытай,
Сагаан сэбэр hэшхэлтэй
Амидаржа ябая! – гээд,
Арад зоноо бүгэдыень
Арюун гүн сэдьхэлhээ
Амаршалнаб мүнөө, амаршалнаб!
Сагаан hараар!
Сагаалганаар!...
Чингис Гуруев.
Бар жэлээ угтуулан
Наhан, наhан. Залиршагүй наhамнай
Хэтын байдал. Хэмжүүргүй hэмнай.
Жэлнүүдшье hубарина. Хүлэгүүдшье инсагаална.
Жэгдэ hайханаар орожо ерэбэл, Бар жэлнай.
Шэнэ жэл. Сагаан hара – Мэндээ!
Шэнын нэгэн. Сагаалган – Мэндээ!
Һама бурхамнай эрьеэд адислаа, арад зоноо,
Буряад-Монгол туургатан бурханаа дэлгээгээ
ёhо гуримаар
Амар мэндэеэ мэдэлсэнэл урдын ёhоор удхалан,
Адуу малаа асуулсанал ондо ороhоор,
Сагаан хүхэ хадагаар, бэлэгээр золголсоон,
Сагаан эдеэгээр хүндэтэ айлшадаа хүндэлөөн.
Жэнхэни буряадай толотомо hайндэр
Жэгүүртэ шубуудай аялга ойртоо,
Жэгтэй гоёор мандабал hайхан үдэр
Жэлнүүдэй андалдаан hэлгээн саг соогоо.
Буурал ахатамнай үреэлээ үреэнэл урматайгаар
Буряад зоной урданай ёhо гуримаар.
Сагаан hайхан нигүүлэсхы боди сэдьхэлтэй
Сагаан дардам харгытай ябахатнай болтогой!
Эхэ зургаан зүйл хамаг амитан
Элүүр энхэ, амгалан тэнюун,
Буянтай хэшэгтэй, золтой жаргалтай,
Баян дэлгэр ажаhуухатнай болтогой!
Yреэhэн үреэлынь буян болон дэлгэрэг лэ.
Һанаhан hаналынь бурхан болон адислаг лэ.
Хэлэhэн үгэнь хэшэг болон билтараг лэ.
Заяаhан заяаниинь зула болон бадараг лэ.
Ум маани бадмай хум!
Ум дари дудаари дүри суухаа!
Баян-Далай Доржиев.
Сагаан hарын мэндэ!
Сагаан hара морилжо,
Сагшье наашаа хараба.
Һүн далай билтаржа,
Сагаан эдеэн дэлгэрбэ.
Һанаан сэдьхэл тэгшэрбэ.
Ажалша малша зондо
Сагаан hарын мэндэ!
Амгалан байдал асарhан эсэгэнэр,
Ажалай габьяа дабаhан эжынэр,
Буурал сагаан ахайнар,
Һаншаг сагаан абгайнар,
Сагаан халаадтай эмшэнэр,
Сагаан hарын мэндэ!
Аяа хайратай хүүгэдни,
Аляа хөөрхэн ашанарни,
Адли тэгшэхэн дүүнэрни,
Анда олон нүхэдни,
Айл хотон хүршэнэрни,
Арад бүгэдэ зондо
Сагаан hарын мэндэ!
Балжима Дашинимаева.
Сагаалганаар!
Сэн-бун, сэбдэг саhан,
Сагаан зузаан хүнжэлөөр,
Сэлгеэ тала хушаатай,
Сагаан hарые угтанал.
Бурзан сагаан саhаар,
Бударан байhан дайдам,
Бар hайхан жэлнай,
Буужа ерэбэ газаамнай.
Бурхан тахилаа hэргээжэ,
Байдал, hуудалаа үзүүлжэ,
Буян хэшэг арьбадхан,
Бултанай түлөө мүргэел!
Сагаан эдеэнэйнгээ дээжэ,
Сэржэм, сайгаа – үргэел!
Санзай адисаа ууюулан,
Сэдьхэл бодолоо арюудхаял!
Аха захатанаараа золгожо,
Анда нүхэдтэеэ уулзаял,
Сагаан hараар, нютагайхид!
Сасуутан, үетэн нүхэд!
Лхамажаб Дабаева.
Могой жэлэй Сагаан hараар!
Саһан сагаан дайдаарнай
Сагаан һарамнай морилбо.
Ага найман эсэгын
Ажалша малша араднай
Һү сэгээ бүлэжэ,
Салгидама дүүрэн эдеэтэй
Һайхан сагаан сэдьхэлээр
Сагаан һаратаяа золгобо.
Бурхан багшын үршөөлөөр
Буряад араднай жаргалтай.
Булта сэдьхэлээ нэгэдэжэ,
Бурхан багшадаа шүтэе.
Табан хушуун малтнай
Талые дүүрэн бүрхөөг лэ!
Тараг, айраг зөөхэйтнай
Табагаар дүүрэн байг лэ!
Одо заяантнай дээрэ байг,
Олоһон олзотнай арьбан байг.
Хүсэл бодолтнай арюун байг,
Хамаг хэрэгтнай бүтэсэтэй байг.
Арад зомнай жаргалтай байг.
Адуу малнай үрэжэлтэй байг.
Хүбүүд басагаднай залитай байг,
Хүгшэд үбгэднай сарюун байг.
Доржо Пунцуков.
Амар мэндэ, харагшан хонин жэл!
Саг жэлнай сууряатан үнгэрнэл,
Сагаан һарамнай сагаалхилан ерэбэл.
Түби дэлхэйемнай тооһотуулан тойрохол,
Түүхэтэ жэлнүүднай туунагтан үнгэрнэл,
Ажабайдалаймнай эрьеэн соо
Арад зоноймнай түүхэ толилогдохол.
Аянай шубуудай ганганалдаан соо
Аянгата мүрнүүд түүрээн бэшэгдэхэл.
Буурай буурал буряад дайдадам
Буужа ерэбэл, хонин жэлнай.
Буржагар хара хонин жэлнай
Бүгэдэ зондоо буян үршөөнэл.
Хушуу харахан хонин жэлнай
Хүн амитандаа этигэн найдуулхал.
Хүхюу хүршэ бэреэд басагаднай
Хэтын һайхан домог түүрээхэл.
Аялдар зантай хонин жэлнай
Ами наһыемнай утадхан байхал.
Амбан хүдэр шамбай хүбүүднай
Амгалан тэнюун үреэл үршөөхэл.
Баяндалай Доржиев.
Сагаан hараар!
Хонгор һайхан хонин жэлнай амжажа,
Хурдан жорхой бишэн жэлээ золгоё.
Yндэр мэдэрэл, үнэн хэрэг һунгажа,
Yрэ зүрхэндөө үлзы буян олгоё.
Yүрэй туяа, улаан нара угтажа,
Һүтэй сайгаа сагаан сэдьхэлһээ сүршэе.
Буурай сагай шэрүүн байдал мартажа,
Һаруул тээшээ һанаан соогоо жүдхэе.
Сагаан һарын шэжэр мүнгэн толон дор
Эгээл уян үгын дээжэ үргэе:
Салуу дайдын үнэр баян үбсүүн дээр
Эхэ Хүндэ гурба һунан мүргэе.
Ардаг хүлэгэй амынь залаха шуналтай
Абын һүлдэ Агын талада мүндэлэг.
Эсэгын нэрэ үргэн ябаха сэнэгтэй
Эдир хүбүүд – талын шэмэг дэнзэлэг.
Улаалзайн үнгэ хасар дээрээ һануулһан
Урихан басагад улам олоор ургаг лэ.
Yргэһэ нойр үни удаан мануулан
Yлзы нютагайм үнжэгэн шарай һэргэг лэ!
Батожаргал Гармажапов.
Бишэн жэлнай морилон буубал
Хун шубуун гарбалтай
Хуһан модон сэргэтэй
Хори буряад хабатай
Хуби заяан нютагтай
Хуба сагаан хонин жэлээ
үдэшэбэл һайхантай!
Сахилзама мүнгэн дайдаяа
Сарюунаар мэндэшэлэн дохилзоод,
Сагаан ашата дэлхэйгээ
Санзайн хангалаар унайруулаад
Сайбалзан буубал бишэн жэлнай
үглөөнэй мэндэтэй.
Түби дэлхэймнай таашаан угтабал
Тойрог зантай бишэн жэлээ
Түүхын хуудаһанда урмашан
бэшэгдэбэл
Түрэл һайнтай бишэн жэлнай.
Баян-Далай Доржиев.
Сагаан hарын толон
Сагаан һараар, сагаалганаар
Амитан зоноо амаршалнаб,
Амтатай сагаан эдеэгээр
Сагаалыт гэжэ уринаб.
Сагаан һарын сахилгаагаар
Сасуутан бараниие амаршалнаб,
Сагаан эдеэнэй үлтэй хоолоор
Сагаалыт гэжэ уринаб.
Сагаагша үнеэнэйм түрөөгүй һаа,
Сагаан эдеэн хаанаһаа бэлэй,
Сагаан һарын ерээгүй һаа,
Сэнтэй уулзалга хаанаһаа бэлэй.
Хүүгшэ үнеэнэйм түрөөгүй һаа,
Хүрэнгэ, тараг хаанаһаа бэлэй,
Хүрэжэ сагаалганай ерээгүй һаа,
Хүүгтэй зугаа хаанаһаа бэлэй.
Сагаан сэбдэг һарамнай
Сахилзан ерэн буудаг,
Сарюун бэрхэ амитамнай
Сагаан эдеэгээр угтадаг.
Зүүн зүгэй шэнэ жэлдэ
Зүрхэ шадалаа нэгэдэн,
Сагаан һараяа угтан абажа,
Сарюун дуунуудаа дууланал һанан.
Сагаан һара гаража,
Сагаалгамнай бурьяба,
Сарюун нүхэд сугларжа,
Ёохор наадан нэрьебэ.
Тэргэд һара гаража,
Тэнгэриеэ толотуулба,
Сагаалгамнай буужа,
Сээжэ зүрхым баясуулба.
Одо мүшэн гаража,
Огторгойгоо толоруулба,
Одоош Сагаалгамнай буужа,
Ой ухааеымнай баясуулба.
Саһан дээгүүр халтирдаг
Мүлигэр шаргам гоё даа,
Мүн барании дуулуулха
Сагаалганай хаба даа.
Сагаан һара сасаржа,
Сагаалгамнай захалба,
Сагаан эдеэн дэлгэржэ,
Салгидан баянаар харагдана.
Саяан хадын үндэрынь
Саһаар ямар баям даа,
Сагаалшуулай сээжэнь
Дуугаар ямар баям даа.
Митрофан Гергенов.
Хулгана жэл
Ама сагаан хулгана жэл
Алтан дэлхэйе эрьен гарахань,
Арад зоной оюун сэдьхэлдэ
Арюухан амгалан байдал асархал.
Хурдан сагаан хулгана жэл
Хамагые түрүүлэн гарахань,
Хүрьhэтэ дэлхэй амилуулан
Хура бороон жэгдэхэн орохол.
Хүнгэхэн сагаан хулгана жэл
Хүлэр дайдаяа эрьен гарахань,
Хангалта сэсэгүүд үнгэтэн hалбаржа,
Хүдөө талада шубууд жэргэхэл.
Халюун хурдан хулгана жэл
Хонгор дайдаяа эрьен гарахань,
Хүдөө нютагтаа дахинаа
Халюуран таряан жэгдэхэн ургахал.
Бардам сагаан хулгана жэл
Баян дайдаяа эрьен гарахань,
Бултанай сэдьхэлдэ жаргал асаржа,
Буян хэшэг үршөөхэл.
Дулмадоржи Дулмажапова.
Сагаалган морилбол
Баян дэлгэр заншалтай,
Буян далай Сагаалган
Сагаан торгон хадагтай,
Сарюун сэдьхэлээр морилбол.
Буруумнай булшантай даа,
Буугаал, ерээл Сагаалган.
Даагамнай далантай даа,
Дуугаа дэлгээл Сагаалган.
Хуушан юумэеэ hандаажа
Шэнэ юумэндэ харгы гаргаал.
Буруумнай булшантай даа,
Буугаал, ерээл Сагаалган.
Даагамнай далантай даа,
Дуугаа дэлгээл Сагаалган.
Эртүүр баран золгожо,
Бэлэг сэлэг барилсаад,
Үреэл үгэеэ хэлсэжэ,
Сагаа hараяа магтан хүхеэл.
Буруумнай булшантай даа,
Буугаал, ерээл Сагаалган.
Даагамнай далантай даа,
Дуугаа дэлгээл Сагаалган.
Агын аймагай Гүнэйн дунда һургуулиин
эхин шатын ангинуудай багша Г.Б.Цырендашиевагай суглуулбариһаа.