Гэр соогоо тахижа байһан тахил, бурхадтаа үдэр бүри мүргэжэ байхын тула, палааха дээрээ шэрдэг гү, али палас (1 метр үргэнтэй, 2 метр утатай) дэлгээд, мүргэлөө дүүргэхэдээ, ореогоод абажархихада тон таарамжатай.
Зүбөөр мүргэхын тула хоер гарайнгаа альгануудые ниилүүлэн, эрхы хургануудаа досоошонь оруулаад, наманшалха еһотой. Энэ хадаа сэсэн ухаан болон энэрхы сэдьхэлэй һүлдэ тэмдэг – дэльбэеэ хаагаад байһан бадма линхобо сэсэгэй дүрсэ болоно. Досоон ороод байһан эрхымнай – сэнхии гээд нэрлэгдэдэг. Сэнхии дээрэмнай Бурхан багша залараад һууна гэжэ сэдьхэхэ еһотойбди.
Наманшалһан гараа соходоо, амандаа, сээжэдээ хүргэхэдөө, бидэ ухаан бодол, хэлэн, бэеынгээ талаһаа муу юумэ гаргангүй, һайн ябадалаа арьбадхахын, муу муухайһаа холодохын түлөө Бурхан багшаһаа адис үреэл абана гээшэбди. Тиигээд тонгойжо, гараараа газар тулаһан хойноо үбдэг дээрээ һуужа, гарнуудаа урагшань дабшуулаад, толгойгоо газарта хүргэнэбди. Тиин һөөргөө бодоходоо, гарнуудаа гэдэргэнь болгожо, үбдэгүүдээ газарһаа таһалжа таһалжа, хүл дээрээ бодохо.
Үшөө һунажа мүргэлгэ гэжэ бии. Һунажа мүргэхэдөө, үбдэг дээрээ һууһан хойноо гарнуудаа урагшань дабшуулжа, бүхы бэеэрээ газар дээрэ гонзойн хэбтэнэбди. Тиигэжэ сохоео газарта хүргэһэн хойноо хоер гараа ниилүүлжэ наманшалаад, тохоногоо газарһаа үргэнгүй, гараараа толгой дээрээ наманшалха.
Иигэжэ 3, 7, 21, 108, гү, али наһанайнгаа тоогоор мүргэжэ болохо.
Мүргэжэ дүүрээд, бурханайнгаа урда ошожо, гараа соходоо, амандаа, сээжэдээ хүргөөд, наманшалһан зандаа тонгойжол, бурханһаа адис абаха хэрэгтэй. Тиин холодоходоо, бурхад руугаа нюураараа харан гарахадаа, Бурхан багшаяа хүндэлнэ, үршөөл хайрадань хүртэнэ гээшэбди.
Наманшалхадаа бидэ бэеэрээ, хэлээрээ, сэдьхэлээрээ мүргэдэгбди. Бэеэрээ мүргэхэдөө гороо, үргэл хэнэбди, хэлээрээ – маани, ном уншанабди, мүн сэдьхэлээрээ – бурхан багша хажуудамнай байна гэжэ сэдьхэн, этигэн мүргэнэ гээшэбди.
«Толон» газетэһээ (2009 оной февралиин 21-нэй) абтаба.

#Сагаалган2025
#Сагаалган2025_Ага
#Сагаалган2025_Забайкалье
#забайкальскийкрай #сагаалган #агинское