Байгша оной октябриин 10-да «Таагты» гэһэн ухаан бодолой урилдаан Агын Буряадай тойрог дотор соносхогдоhон Буряад хэлэнэй hарын хэмжээндэ Гэр бүлын жэлдэ дашарамдуулагдан үнгэргэгдөө. Хэмжээ ябуулга байгуулагшад болон эмхидхэгшэд – Агын Буряадай тойрогой захиргаан болон Үбэр Байгалай хизаараар буряад соел хүгжөөлгын түб.
Дүн хамта Агын Буряадай тоорогой гэр бүлэнүүдэй долоон можо, наһанай хэдэн хэмжүүрэй 35 хүн нааданда хабаадажа, ухаан бодолоо гүйлгэһбн байна. Мүрысөөн 4 шатаһаа бүридөө, хабаадагшадта “Россиин Герой Бадма Жабон”, “Агын Буряадай тойрогой хүндэтэ эрхэтэд”, “Табан хушуун мал”, “Агын Буряадай ёһо заншалнууд” гэһэн асуудалнуудта харюусаха даабаринууд үгтөө.
Кроссворднуудай автор — Могойтын аймагай Сагаан-Уула нютагай, Ородой Холбоото уласай арадай гэгээрэлэй эрхим, Багшын ажалай ветеран Будажаб Доржиевич Цыбегмитов мүн болоно.
Агын Буряадай тойрогой 86 жэлэй ойн баяраар дашарамдуулан, мүн Буряад хэлэнэй фестивалиин хэмжээндэ Б.Д. Цыбегмитовай хэдэн олон жэлнүүдэй хугасаада буряад, ород хэлэнүүд дээрэ зохёоһон кроссворднуудай суглуулбари Үбэр Байгалай хизаараар буряад соёл хүгжөөлгын түбтэ ном болгогдожо хэблэгдэһэн юм. Энэ суглуулбари соо түрэл тоонто нютаг, тойрогой мэдээжэ зон, буряад арадай ёһо заншал, буддын шажан, нютагаймнай ан амитад тухай, мүн хүүгэдэй тааха бэлэн кроссворднууд, дүн хамта 41 кроссворд ороо, суглуулбари 8 бүлэгһөө бүридэнэ.
Халуун нааданай дүнгөөр түрүүшын һуури Ага тосхоной «Үлзы» можо (хүтэлбэрилэгшэ — Дулмажаб Санжимитуповна Дылгырова) эзэлжэ, 7500 түхэригэй мүнгэн шанда хүртөө. Хоёрдохи һуурида Ага тосхоной «Улаан Булаг» можо (хүтэлбэрилэгшэ — Цыбегмит Эрдынеевна Жалсандоржиева) илажа гараад, 6250 түхэригөөр шагнагдаа. Гурбадахи һуури Агын аймагай Сахюурта нютагай «Сахюрта» можо (хүтэлбэрилэгшэ — Баир Дамдинович Лхамаев эзэлжэ, 5000 түхэригтэ хүртөө. Шангай һуурида гараагүй Агын аймагай Согто-Хангил нютагай «Талаан бэлиг» можо (хүтэлбэрилэгшэ — Аюр Бальжинимаевич Норбоев), Могойтын аймагай Сагаан-Уула нютагай «Яанги» можо (хүтэлбэрилэгшэ — Белигма Баторовна Николаева), Ага тосхоной «Урагшаа» можо (хүтэлбэрилэгшэ — Цыжигма Дашиевна Базарова), Ага тосхоной «Будамшуу» можо (хүтэлбэрилэгшэ — Пильжидма Жигжитжапова) гэгшэд хабаадагшын баталамжада болон гарай бэлэгүүдтэ хүртөө.
Гэр бүлэнүүдэй хоорондо үнгэргэгдэһэн нааданда эдэбхитэйгээр хабаадаһан бүхы можонуудта халуун баярые эмхидхэлэй хорооной зүгһөө хүргэнэбди! Ухаан бодолоороо илгаран гараһан илагшадаа халуунаар амаршалнабди!