Үсэгэлдэр, мартын 13-да, Агын аймагай Согто-Хангилай дунда һургуулиин танхим соо энэ нютагай уран зохеолшон, поэт Светлана Махабадаровагай «Угай нангин харгы» гэһэн ээлжээтэ шэнэ номтой танилсуулга дулаахан оршон байдалда үнгэрөө.

Светлана Аюровнада Агын тойрогой, аймагай засаг зургаануудай, номой сангуудай, Жамьян Балданжабоной нэрэмжэтэ уран зохеолой нэгэдэлэй, соелой хүдэлмэрилэгшэдэй, анда нүхэдэйнь, нютагайхидайнь, түрэлхидэйнь зүгһөө амаршалгын һайхан үгэнүүд, сэнтэй үреэлнүүд зорюулагдаа.  

Үбэр Байгалай хизаараар буряад соел хүгжөөлгын түбэй захирал, ажалтад амаршалгын бэшэг соогоо номой авторта, эгэшэ нүхэртөө иигэжэ хандаһан байна: «Мүнөөдэр Агын Буряадай тойрогой, бүхыдөө буряад-монголшуудай ажабайдалда ехэ гүнзэгы удхатай хэмжээ ябуулга боложо байна. Арадайнгаа түүхэ, еһо заншал, соел уудалан һэргээжэ, улам дамжуулжа байһантнай сэгнэшэгүй. Тойроод байһан эхэ байгаалиингаа баялигые, нютаг нугынгаа һайханиие, арад зонойнгоо аша габьяае, инаг дуранай элшэ хүсэ, эжын энхэрэл, гэр бүлын гал гуламта зураглан, гүн сэдьхэлэй оеорһоо бэшэһэн зохеолнуудтнай олоной анхарал эзэлүүдгүй татадаг, уншагшадта гоё һайханай мэдэрэл түрүүлдэг.

Дээрэһээ заяагдаһан шадабаряараа ургажа ябаа залуу үетэнтэй, бүхыдөөл уран шүлэгтэ дуратай бэлигтэйшүүлтэй хубаалдажа, тэдэниие уранаар бэшэхэ оньһонтой танилсуулжа, нарин талануудтань һургажа, зоригжуулжа байһантнай урматай. 

Светлана Аюровна! Зохёохы замдатнай амжалта хүсэн, үшөө олон бүтээлнүүдээрээ арад зоноо баясуулжа байхыетнай үреэнэбди! Бүтээһэн ажалтнай буян боложо арьбажаг лэ, угайтнай утаһан булаг мэтэ сорьёлог лэ!

Гэр бүлэдөө золтой жаргалтай, ажабайдалдаа аза талаантай, элүүр энхэ, амгалан тэнюун һуугыт даа!»