Үбэр Байгалай хизаараар буряад соёл хүгжөөлгын түбэй дэргэдэ ээлжээтэ суглуулбари - «Эдир наһанайм мүрнүүд» гэһэн шүлэгүүдэй суглуулбари барлагдан хэблэгдэбэ. Энэ удаа залуу уран зохёолшон Санжита Аюровагай шүлэгүүд буряад хэлэндээ, уран шүлэг, зохёолдо дуратай залуушуулые, мүн бэшэшье уншагшадые заатагүй һонирхуулхань лабтай.
Мартын 8-най һаруул, сэлмэг һайндэрэй урда тээхэнэ энэ хэблэлэй гараһаниинь зүйтэй, юуб гэхэдэ автор хүнгэн, абтасатай, холые хараалһан шүлэгүүд соогоо аба эжы, инаг дуран, түрэл нютаг тухай, сэдьхэлэйнгээ байдал, нүхэдтөө захяа уян нугархай буряад хэлэн дээрээ найруулан бэшэнэ.
Алас холые зориходоо
Аймаг нютагаа бу алдаарай,
Аха дүүгөө үргэжэ,
Абьяас бэлигээ бү алдаарай.
Тоонто нютагайнгаа шорой гэшхэжэ,
Хүн болоhоноо hанажа ябаарай,
Зүрхэнэй буланда сохилhон,
Халуухан дураяа гамнаарай.
Поэт, Үбэр Байгалай хизаарай соелой габьяата хүдэлмэрилэгшэ, Ородой холбоото уласай Уран зохёолшодой холбооной гэшүүн Дугарма Батоболотовагай Санжита Аюрова тухай бэшэһэн зураглал суглуулбариин түрүүшын нюурта толилогдоо.
Санжита 2003 ондо Согто-Хангил нютагай Баир Димидма Дулмаевтанай бүлэдэ түрэһэн. Бага наһанһаа һүбэлгэн бэрхэ басаган үндыһэн. Зургаа наһатай Санжита Согто-Хангилайнгаа соёлой байшанай тайзан дээрэһээ Цырен - Дулма Дондогойн "Хүн болохо бэлэн бэшэ" гэжэ шүлэг уран гоёор уншаад, нютагайхинаа, аба эжыгээ баярлуулһан ха. Уран нугархай, бэлигтэй Санжита, мэдээжэ болоһон "Тэршээхэн унаган" гэжэ хүүгэдэй арадай аман зохёолой, дуу хатарай бүлгэмэй эдэбхитэй гэшүүн болоод, холо ойгуур харалга-мүрысөөнүүдтэ хабаадажа, дунда һургуулияа дүүргэтэрээ ябаһан. "Гэр бүлэдөө “Толон” һонин захидаг, эжы абынгаа уншадаг байһан тула, бишье ехэ һонирхожо уншадаг болоо һэмби"- гээд Санжита хөөрэнэ.
Чойжил-Лхама Базаронай нэрэмжэтэ Согто-Хангилай дунда һургуулида һуража ябаа сагтань буряад хэлэ бэшэгэй Бадма-Ханда Базарсадаева багшынь үүргэ ехэ байгаа. Багшын хүтэлбэри доро багахан зохёол, найруулга, шүлэг бэшэжэ эхилһэн байна. Эрмэлзэл бэлигтэй басаганай шүлэгүүд "Толоной" нюурнуудта толилогдожо эхилээ. 2014 ондо соносхогдоһон "Алтан үлгы - Агамни" гэжэ залуу уран шүлэгшэдэй мүрысөөндэ илажа гараһан.
Хэнэйшье мэдэһээр, бэлигтэй хүн алишье тээшээ адли тэгшэ шадабаритай байдаг гээшэ. Хүнгэн гүйдэлэй тамираар бэеэ һоридог, забда сүлөө олоод, аалихан бодолдо абтахадаа, сэдьхэлээ уудалжа уран шүлэг найруулдаг, Шэтын гүрэнэй эмнэлгын академиин 4-дэхи курсын оюутан Санжитын ажабайдалай үргэн зам үшөө урдань. Мүнөө шүлэгүүдэйнь түрүүшын суглуулбари “нара хараба”. Олон тоото уншагшадаа уран шүлэгэйнь дээжэһээ хүртэхынь уринабди.
