Байгша оной февралиин 13-да Үбэр Байгалай хизаарай уран һайханай музейн танхим соо Агаһаа уг гарбалатай, талаан бэлигтэй уран зураашадай – Ородой Холбоото уласай уран зураашадай холбооной гэшүүн Зоригто Ешиевай “Добрый свет Сагаалгана” болон Баирма Ешидоржиевагай “Минии уг – минии хүсэн” гэһэн үзэсхэлэнүүд баяр еһололой оршон байдалда нээгдэбэ. Хизаар дотор удха шанартай хэмжээ ябуулгада Үбэр Байгалай хизаараар буряад соел хүгжөөлгын түбэй захирал Сэсэг Норполова уран зураашадай урилгаар хабаадаһан байна. Эдэ хоер талаан бэлигтэн түбтэй нягта холбоотой, дүтэ харилсаатай хүдэлдэг гээд тэмдэглэлтэй.
Зоригто Ешиев Үбэр Байгалай хизаараар буряад соел хүгжөөлгын түбэй эмхидхэн үнгэргэдэг Ородой Холбоото уласай уран зураашадай холбооной гэшүүн, Үбэр Байгалай хизаарай урлалай габьяата ажаябуулагша, Россиин арадай гэгээрэлэй эрхим, багшын ажалай ветеран Доржи Гомбоевой нэрэмжэтэ “Край мой любимый – Ага” гэһэн уран һайханай зохеолгын заншалта мүрысөөнэй шүүгшэдэй бүлгэмэй гэшүүнээр түрүүшын мүрысөөнһөө эхилжэ, үхибүүдэй ажалнуудые сэгнэдэг. Мүн эмхиин зууршалгаар Буряадай уласхоорондын “Алтаргана” фестивалиин арадай гар урлалай бүтээлнүүдэй үзэсхэлэн-мүрысөөндэ нэгэтэ бэшэ хабаадажа, 2018 ондо лауреадай нэрэ зэргэдэ хүртэһэн юм.
2022 ондо Үбэр Байгалай хизаарай дэбисхэр дээрэ Баирма Ешидоржиевагай түрүүшын үзэсхэлэн Үбэр Байгалай хизаараар буряад соел хүгжөөлгын түб “Шэнэ нэрэнүүд” гэһэн нютагай залуу, ургажа ябаа талаан бэлигтэниие дэмжэхэ, олоной анхаралда гаргаха зорилготой түлэблэлэй хэмжээндэ эмхидхэһэн юм.
Зоригто Ешиев февралиин 9-һөө мартын 10 болотор үргэлжэлхэ үзэсхэлэнэйнгээ зурагууд соо буряад арадайнгаа хэдэн мянган жэлэй оюун сэсэниие, заншал болон ажабайдалай нюусануудые, эхэ байгаалидаа үнэн зүрхэнһөө дуратайе ялас гэмээр харуулна.
Баирма Ешидоржиевагай ажалнууд уг удамуудтай нягта холбоотой. Илангаяа мүнөөнэй эрхэ байдалда таараһан зурагуудынь харагшадай анхарал эзэлүүдгүй татадаг - Эхэ оронойнгоо түлөө тэмсэхээр бэлэн эрэлхэг зоригтой баатар сэрэгшэдэй хойнонь угайнь харууһан, угһаань ороһон хүсэ шадал этигэмээр зураглагданхай. Мүн Баирмагай зохеохы ажаябуулгада гое һайхан буряад эхэнэрнүүд онсо һуури эзэлдэг.
Ая гангата Агымнай үлгыһөө тэнжэн гараһан, арадайнгаа соёл урлал, түүхэ намтар, ёho заншал сахин үлөөлгэдэ, улам хүгжөөлгэдэ горитой хубитаяа оруулжа байһан, ажабайдалдаа онсо өөрын харасатай, ехые дабшаха дундаршагүй эрмэлзэлтэй уран зураашадаа үзэсхэлэнүүдэйнь нээлгээр амаршалнабди! Талаан бэлигүүдынь оюун эрдэнеэр задаржа, улам ехээр бадаржа, гайхамшагта бүтээлнүүдээрээ арад зоноо баясуулжа, буряадайнгаа һүр һүлдэ дээрэ үргэжэ, үндэр амжалтануудые туйлажа ябахыень гүн сэдьхэлһээ үреэнэбди!
