Ородой Холбоото Уласта, мүн дэлхэйн үшөө 12 гүрэнүүдтэ жэл бүри, майн 24-дэ Славян бэшэгэй ба соёлой үдэр тэмдэглэгдэдэг. Энэ һайндэр хэдэн сая зониие нэгэдүүлнэ. Һайндэрэй эхи үндэһэн славян үзэглэл байгуулагшад, нангин һүзэгтэн Кирилл Мефодий хоёрые ёһололготой нягта холбоотой.

89f36d14b000e48488a9811929a00ed7

Кирилл Мефодий хоёр - түрэһэн аха дүүнэр, Солуни гэжэ (мүнөө Салоники) грек хотодо нэрэтэй солотой, һүзэгтэй бүлэдэ түрэһэн.  

Мефодий түрүүн сэрэгэй албанда бэеэ зорюулаад байһан аад, удаань монастырьда алба хаажа эхилээ. Кирилл Константинопольдо ехэ эрдэмтэдтэ һуралсал гараһан. Һургуулияа дүүргэхэдэнь, Нангин Софиин сүмын дэргэдэхи номой сангай хадагалагшаар томилогдоһон байна. Тэрээнтэй хамта Кирилл Константинополиин дээдэ һургуулида философи заагаа.

Удаань Кирилл Мефодий ахадаа Олимпдэ монастырь ошожо, бурхандаа мүргэжэ, шажанай номуудые уншажа сагаа үнгэргэгдэг һэн. Тэндэл түрүүшынхеэ славян хэлэ үзэжэ эхилээ.

863 ондо Кирилл Мефодий ахатаяа, Климент, Горазд, Наум, Савва ба Ангеляр һурагшадтаяа славян үзэглэл зохёожо, Евангелие, Псалтырь номуудые оршуулһан байна. Үзэглэл Кириллэй нэрээр “кириллица” гээд нэрлэгдэһэн байна.

Славян бэшэгэй ба соёлой үдэр Росси гүрэндэ түрүүшынхеэ 1863 ондо – славян үзэглэл байгуулагдаһаар 1000 жэлдэ дашарамдуулагдан тэмдэглэгдэһэн юм.

Совед засагай ерэхэдэ, һайндэр мартагдажа, 1991 ондо РФ-н Верховно Зүблэлэй Президиумэй 568-1 дугаар Тогтоолоор гүрэнэй һайндэр болоһон байна.

Энэ үдэр фестиваль нааданууд, үзэсхэлэнгүүд, номой яармагууд, уншалганууд, концертнүүд болон бэшэшье соёлой хэмжээ ябуулганууд эмхидхэгдэдэг.  

Баримтата мэдээнүүд:

  • Славян бэшэгэй ба соёлой үдэр 8 гүрэнүүдтэ тэмдэглэгдэдэг: Росси, Украина, Белорусси, Болгари, Хойто Македони, Серби, Чехи, Молдова. Зарим гүрэнүүдтэ һайндэр ондоо үдэрнүүдтэ тудадаг;
  • 13 хэлэнүүд (ондоо тоогоор 10-һаа 18 болотор) славян бүлэгтэ ороно;
  • дэлхэй дээрэ 400 гаран сая зон славян бүлэгэй хэлэнүүд дээрэ хөөрэлдэнэ.