Агын Буряадай тойрогто, бүхыдөө Yбэр Байгалай хизаарта хэдэн ондоо үндэhэ яhатан эб нэгэтэй, мүр мүрөө дүнгэлсэн ажаhуудаг. Арад бүхэн өөрын соелтой, заншалтай, хэлэ бэшэгтэй, түүхэтэй. Тиимэhээй Yбэр Байгалай хизаараар буряад соел хүгжөөлгын түб арадуудай онсо баялиг үлөөн хүгжөөхэ, дэлгэрүүлхэ, олон зондоо харуулха, залуу үетэниие Эхэ орондоо дуратайгаар хүмүүжүүлхэ гэhэн зорилготой ажал ябуулдаг. Ажаябуулгын энэ шэглэл хадаа харалга мүрысөөнүүдэй, фестивальнуудай, үзэсхэлэн-яармагуудай аргаар нэбтэрүүлэгдэдэг юм. Тэдэнэй нэгэниинь – хизаарай хэмжээнэй «Играй, гармонь, звени, частушка!» фестиваль-мүрысөөн болоно.

Тус мүрысөөн 2013 ондо Дулдаргын аймагай Ара-Иля нютагта эхи үндэhэ абажа, тэрэ сагhаа хойшо жэл бүри Агын тойрогой аймагуудай газар дэбисхэрээр нүүжэ, үргэн дэлисэтэйгээр, олон зоной хабаадалгатайгаар үнгэргэгдэдэг.

Түрүүшын фестивальда 50 гаран хүн хабаадаhан байна, удаадахи жэлдэнь — Могойтын аймагай Нуринскдэ 150 хүн, hүүлэй жэлнүүдтэ 300-гаад хабаадагшад талаан бэлигээрээ, арга шадабаряараа мүрысэдэг болоhониинь hайшаалтай. Үргэн уужам хизаараймнай баруун бэеhээ зүүн бэе болотор аймагуудhаа дуушад болон арадай хүгжэмэй зэмсэгүүд дээрэ гуйсэдхэгшэд суглардаг юм.

Энэ фестиваль 2016 ондо хизаарай социальна удха шанартай хэмжээ ябуулгануудай тоодо ороhон.

Мүноо 13-дахи дугаар фестиваль июниин 7-до Могойтой тосхоной соелой байшан соо, мүн газаахи талмайдань үнгэргэгдэхэ, бэлэдхэлгын горитой ажал ябуулагдажа байна, хабаадагшадhаа мэдүүлгэнүүд орожол байна. Мүнөө дээрээ 11 аймагуудhаа мэдүүлгэнүүд оронхой. Үшөө саг байна, тиимэhээ мэдүүлгэеэ үгөөдүүй коллективүүд, солистнууд байбал, оруулхадатнай, түбэй электронно хаягаар agacnt@mail.ru эльгээхэдэтнай болохо гээд мэдүүлхэ байнабди.

Мүрысөөн 2 янзаар үнгэргэгдэдэг: частушкануудые, ород арадай дуу гүйсэдхэгшэдэй хоорондо, мүн арадай хүгжэмэй хэрэгсэлнүүд дээрэ гүйсэдхэгшэдэй хоорондо наhанай хэдэн хэмжүүртэ мүрысэгшэд сэгнэгдэдэг. Гэхэтэй хамта тусхай мэргэжэлтэй гүйсэдхэгшэ, өөрын дуранай гүйсэдхэгшэ гээд илгардаг. Тэрээнhээ гадна, хабаадагшадай хоорондо ород арадай эрхим хубсаhанай мүрысөөн соносхогдодог, тиимэhээ хабаадагшаднай жэл бүри үндэhэн гое hайхан хубсаhатай байхые оролдодог юм. Эгээл үндэр наhатай хабаадагшад урмашуулагдадаг, недондо жэл Дээдэ Шэтын 84 наhатай Ирина Агапитова шагнадаа hэн, мүноо жэл дуэдтэ хабаадахаяа мэдүүлгэ үгөөд байна.

Шүүгшэдэй бүлэгтэ хизаарай, тойрогой соелой болон урлалай эрхим, урдаа хараха мэргэжэлтэд хабаададаг. Хэдэн жэлэй туршада шүүгшэдэй бүлэгэй түрүүлэгшээр Ородой Холбоото Уласай соелой габьяата ажалтан Андрей Безлепкин ажаллаhан байна.

Жэл бури хизаарай соелой училищин багшанар Елена Беляева, Олеся Петунина гэгшэд шүүгшэдэй булэг түрүүлдэг, мүнөө жэл инструментальна гүйсэдхэлгэдэ хизаарай О.Лундстремай нэр. филармониин уран hайханай хүтэлбэрилэгшэ Сергей Колядин, мүн жюриин гэшүүдээр Б.Ринчиногой нэр. Агын багшанарай колледжын хүгжэмэй багшанар Зинаида Санданова, Баир Балдандашиев, «Амар сайн» театрай гол дуушад Дашима Цынгуева, Ирина Насанова, ахамад дирижер Баатр Лиджи-Гаряев гэгшэд сэгнэхэ юм.

Фестивалиин хэмжээндэ интерактивна талмайнууд эмхидхэгдэдэг: урашуулай гар урлалай үзэсхэлэн-яармаг, мастер-классууд, ород арадай эдеэ хоолой газарнууд, самоварнуудай мүрысоон г.м. сугларагшадые hонирхуулдаг гээшэ.

Ородой аман зохеол хүжөөхэ хараа шэглэлтэй фестивальнай улам бүри хүгжэлтэ абажа байхадань, бидэ, эмхидхэгшэд, урма баяртайнууд, бүри олон хабаадагшадтай боложол байха гэжэ этигэл найдабаритайнууд байнабди. Хүхюун дорюун аялга дуунууднай, арадай хүгжэмэй зэмсэгүүдэй абяа хүгжэмүүд хододоо зэдэлжэл, зониие баясуулжал, урма зориг түрүүлжэл байхань лабтай.

Баирма Соктоева, түбэй захиралай орлогшо.