Арадай аман зохёолой «Түмэн Жаргалан» бүлгэмэй байгуулагдаhаар 35 жэлэй ойдо зорюулагдаhан хэмжээ ябуулга Ага тосхоной соёлой байшан соо баяр ёhололой оршон байдалда үнгэргэгдэнэ.

Үбэр Байгалай хизаараар буряад соёл хүгжөөлгын түбэй зүгһөө дулаахан амаршалгын үгэнүүд ойн баяр угтагша булгэмэй гэшүүдтэ, хутэлбэрилэгшэ С. Ц. Жамбаловада дамжуулсгдаба:

Буряад арадайнгаа хэр угhаа дамжан ерэhэн соёл урлалаа, ёһо заншалаа, түүхэ намтараа, жэнхэни hайхан эхэ хэлэеэ, аман зохёолоо дэлгэрүүлэн хүгжөөхэ хэрэгтэ горитой хубитаяа оруулжа байһантнай сэгнэшэгүй. Танай аша оролдолгоор, үсэд нэтэрүү шэнжэлэлгын ажал ябуулжа, олоной анхаралда арадайнгаа дундаршагүй баялиг тобойлгон харуулжа, залуу үетэндэ дамжуулжа байhандатнай бидэ баяртайбди.

Тойрогоймнай соёлой үзүүр бүлгэмүүдэй нэгэн болохо «Түмэн Жаргаланай» гэшүүн бүхэнэй талаан бэлиг, дундаршагүй дүүрэн шадабари — сээжэ зүрхэнэйнгөө оёорһоо гаргажа гүйсэдхэhэн хатар дуунууд болон табилганууд, арад түмэнэй зүрхэ сэдьхэл хүмэрюулхэ шэдитнай — бурханһаа үгтэһэн табисуур ха юм даа.

Зохёохы ажаябуулгадатнай дундаршагүй эрмэлзэл, зоригжол, амжалта туйлалтануудые хүсэнэбди! Урдаа табиһан түсэбүүдээ дүүрэн бэелүүлүүлжэ байгытдаа! Гэр бүлэдөө золтой жаргалтай, аза талаантай, энхэ элүүр, хододоо урма баяртай, дүүрэн хэшэгтэй ябахатнай болтогой!