«Хэтын жагсаал» («Бессмертный полк») Бүхэроссиин хүдэлөөн мүнөө жэл майн 9-дэ хэбээрээ үнгэргэгдэхэ. Баатар сэрэгшэдэй дурасхаал мүнхэлһэн акцида хүн бүхэн хабаадаха аргатай.
Ага тосхондо «Хэтын жагсаалда» хабаадагшад Комсомолькая гудамжада Агын социальна һалбариин  ажалтадай мэргэжэл  дээшэлүүлгын институдай дэргэдэ үдэрэй 11:30 сагта сугларха юм. Баатарнуудай аллей дээрэ мүнхэ дурасхаалай митингын удаа, 12:30 сагhаа Комсомольская гудамжаар, тиин холбооной авто-зам (федеральная трасса) дээгүүр гаража,  хүүргэ дабаад, түб стадион  хүрэжэ ерэхэ. Эндэ 13:30 сагhаа Илалтын баярай хэмжээ ябуулга үнгэргэгдэхэ.
Эсэгэ ороноо хамгаалгын Агууехэ дайнда хабаадаһан, ара талын ажалда хүдэлһэн аба эжынэрэйнгээ, үбгэ эсэгэнэрэйнгээ, түрэлхидэйнгээ гэрэл зурагуудые бариhан мянга гаран нютагайхид жагсаалда хабаадахаар хараалагдана.
Баатар ветерануудайнгаа дүрэ зурагуудые ёhо соонь зохёолгожо, хэблүүлхэ гэбэл, Үбэр Байгалай хизаараар буряад соёл хүгжөөлгын түбтэ хандахадатнай болохо. Энэ асуудалаар холбоо бариха утаhан: +7 999 603 5027.