Агын Буряадай тойрог дотор Буряад хэлэнэй фестивалиин нээлгын баяр еhолол байгша оной сентябриин 27-до Ага тосхоной амаралгын ба соёлой паркһаа һайндэрэй жагсаалаар эхилһэн байна.
Агын Буряадай тойрогой захиргаанай хүтэлбэрилэгшын орлогшо, социальна оршомой хүтэлбэриин дарга Билигма Будаева бүгэдэ сугларагшадые амаршалжа, үреэлэй һайхан үгэнүүдые хэлээд, фестивалиин нээгдэһэндэ тоологдоһые соносхобо.
Тус жагсаалда Ага нютагайхин, Агын тойрогой засаг зургаануудай, федеральна болон муниципальна эмхи зургаануудай ажалша коллективууд, ажалай ветеранууд, оюутад, һурагшад, олондо мэдээсэл тараадаг хэрэгсэлнүүдэй хүдэлмэрилэгшэд Ага найман эсэгын тугуудай намилзаан, буряад дуунай хүгжэм доро далайдал баян, дэлхэйдэл үргэн түрэл хэлэеэ магтан, түүрээн алхалба.
Түб талмай дээрэ И.Д.Кобзоной нэрэмжэтэ Агын хүүгэдэй урлалай һургуулиин морин-хууршадай «Агын аялга» ансамбль (хүтэлбэрилэгшэнь – Баатр Лиджи-Гаряев) аялга хүгжэмөөрөө угтажа, сугларагшадые ехэл баясуулһан, һайндэртэ онсо байдал тогтооһон байна.
Тус хэмжээ ябуулгада түрэл хэлэндээ үнэхөөрөөл дуратай, жэнхэни хэлэеэ хүндэлдэг, дээрэ үргөөд ябадаг зон суглараад байһанаа гэршэлжэ, коллектив бүхэн түрэл хэлэеэ магтаһан, холые хараалһан уран шүлэгүүдые уншажа, буряад хэлэнэйнгээ одо заяаень бүришье дээшэнь үргөө гээд хэлэхэдэ, тон зүб байха.
— Агын Буряадай тойрог дотор соносхогдоһон буряад хэлэеэ үлөөхэ, хүгжөөхэ, улам дэлгэрүүлхэ гэһэн заншалта уряа бүгэдэ зоной дэмжэжэ, олоороо хабаадажа байхадань ехэ баяртай байнабди. Саашадаа энэл зандаа эбтэй эетэй, үгэ нэгэтэй, хүн бүхэн арадайнгаа хүгжэлтэдэ хубитаяа оруулжа, сэдьхэлээрээ зальбаржа байял даа, — гээд эмхидхэлэй хорооной зүгһөө Үбэр Байгалай хизаараар буряад соел хүгжөөлгын түбэй захиралай уялга дүүргэгшэ Баирма Соктоева уряална.
Буряад хэлэнэй һайндэрые Ким Иванович Базарсадаевай нэрэмжэтэ хүүгэдэй уран урлалай һургуулиин «Баяр» хатарай ансамбль (хүтэлбэрилэгшэнь — Екатерина Абидуева) «Басагадай хатар», Агын аймагай соелой болон сүлөө сагаа үнгэргэлгын түбэй дуушан, Агын Буряадай автономито тойрогой габьяата хүдэлмэрилэгшэ Доржи Дондоков “Нютагаа һананаб” гэһэн дуу гүйсэдхэжэ, үнэхөөрөөл, “нюдэнэй шэмэг, шэхэнэй баяр” болоһон байна.
Буряад хэлэнэй һайндэрэй хэмжээндэ Үбэр Байгалай хизаараар буряад соел хүгжөөлгын түб буряад-монгол каллиграфяар болон сомпи шагта бүтээлгээр мастер-классуудта, багшын ажалай ветеран Сагаан-Уула нютагай Будажаб Цыбигмитовай зохеоһон буряад хэлэн дээрэ кроссворднуудые таалгада, мүн И.Д. Кобзоной нэрэмжэтэ Агын хүүгэдэй урлалай һургуули арадай наадануудта урижа, сугларагшад һонирхон хабаадаһан байна.
