Үбэр Байгалай хизаараар буряад соёл хүгжөөлгын түб 5 жэлэй саада тээ, Агууехэ Илалтын 75 жэлэй ойн баярта дашарамдуулан, тусхай сайтынгаа нюурта «Фронтовые письма» гэhэн рубрика нээжэ, сэрэгшэдэй – нютаг хүбүүдэйнгээ дайнhаа эльгээhэн бэшэгүүдые согсолон, толилжо эхилhэн юм. Мүнөөдэрэй байдалаар тус рубрика дотор 16 сэрэгшэдэй дүн хамта 20 бэшэг толилогдонхой, 10 мянган хун hонирхожо хараhан, уншаhан байна.
Дайнhаа ерэhэн бэшэгүүд… Эсэгын дайнай бүхы түүхэтэ үнэниие харуулhан сэгнэшэгүй дансанууд. Сэрэгшын буу дээрээ, шулуун, хабтагай дээрэ, нүхэрэйнгөө нюргашье хэрэглэжэ бэшэhэн бэшэгүүд дайнай дүлэнэй, буу hомоной үнэртэй. Дайнай бэшэг бүхэн соо тама гаража, хүн бэеэ алдаагүй сэрэгшэдэй абяан, тэрэ зэбүүрхэмэ сагай баримтануудай гэршэ. Үгэ бүхэн соонь — хүнэй хуби заяан, дайнай үнэниинь — бэшэгүүд соо.
Сэрэгшэд гэртээ бэшэг бэшэхэдээ, өөр тухайгаа олон юумэ бэшэнэгүй, «амиды мэндэб, hанаагаа бу зобогты» гээд, аба эжынгээ бэе махабадаар, гэртэхи байра байдалаар hонирхожо бэшэhэн байна. Мүн заабол, «илажа, гэртээ бусахаб» гэhэн бата бэхи найдалтай бэшэнэ.
Сэрэгэй почтын хүтэлбэриин мэдээгээр hара бүри дүн хамта 70 млн. бэшэг хүргэгдэдэг байгаа. Дайнай дүрбэн жэл соо 6 миллиардhаа үлүү бэшэг хүргэгдөө.
Дайнай үедэ саарhанай тон хомор дээрэhээ сэрэгшэд тетрадиин хуудаhан дээрэ, ехэ юумэ бэшэхын түлөө дүтэ дүтэ, жаахан шрифтээр бэшэжэ, тэрэнээ треугольник болгожо зохёогоод, гадар таладань хаягаа бэшээд, няангүйгөөр эльгээдэг hэн.
Онгоhон бэхэтэй шарлаhан бэшэгүүд айлнуудта тон гамтайгаар хадагалагдаад байдаг.
Тиимэhээ нютаг зоноо манда бэшэгүүдээ асаржа, манай сайт дээрэ толилжо, олон зондо дамжуулха, түүхэеэ залуу үетэндөө хөөрэхэ, сэрэгшэдэй эрэлхэг зоригые, Эхэ орондоо үнэн сэхыень дамжуулаял даа гэжэ уряалнабди.
Сэрэгшэдэй бэшэгүүдтэй байбал, agacnt@mail.ru сахим хаягаар эльгээхэдэтнай болохо, асуудалай байбал, 8-999-730-44-91 утаhаар хонходоходотнай болохо.
Сэрэгшэдэй бэшэгүүд эндэ: https://старый-сайт.бурятскаякультура.рф/9-maya/pis-ma-s-fronta