Буряад хэлэн гээшэ хадаа дэлхэйн эгээл баян, уян нугархай хэлэнүүдэй нэгэн, энээниие лама санаартан, уран зохёолшод, шүлэгшэд, эрдэмтэд болон соёлой ажалтан бэе дээрээ мэдэрдэг, түрэл хэлээрээ омогорхон түүрээдэг юм.

Зүгөөр Юнескын дэбтэртэ үндэһөөрөө үгы боложо, хосоржо байһан хэлэнүүдэй тоодо ороод байһаниинь харамтай. Энэ аюулта ябадалтай бидэ бултааран нэгэдэжэ тэмсэхэ ёһотойбди! Түрэл хэлэеэ үеһөө үедэ дамжуулха гээшэ – хүн бүхэнэймнай гол шухала уялга болоно ха юм.

Жэл бүри үнгэргэгдэдэг бүгэдэ буряадай “Эрдэм” диктант эхэ хэлэеэ хүгжөөлгэдэ, улам дэлгэрүүлгэдэ гол һуурияа эзэлдэг. Мүнөө жэл мартын 12-то ээлжээтэ диктант эхиеэ абахань. Тиимэһээ бидэ бүгэдөөрэн эдэбхитэйгээр хабаадажа, сагаа аша үрэтэйгөөр, һонирхолтойгоор үнгэргэел гэжэ уряалнабди!