Байгша оной ноябриин 24-дэ Буряадай уласхоорондын XIV “Алтаргана” фестивалиин хэмжээндэ эрдэмэй-дүршэл ололгын хуралдаан онлайн аргаар үнгэргэгдэбэ. Эндэ дүн хамта хоёрзуугаад зон Монгол оронһоо, Хитад, Чехословаки гүрэнүүдһээ, Ородой Холбоото Уласай нютаг оронуудһаа хабаадаһан байна. Тус хуралдаан 6 талмайда үнгэржэ, пленарна зүблөөн дээрэ тобшолол гаргагдаа.

Гурбадахи секци “Современные тенденции развития бурятской культуры: национальная, этническая и региональная идентичность в условиях межэтнической интеграции” гэһэн гаршаг доро эмхидхэгдээ. Дүн хамта дүшэ гаран хабаадагшадай юһэниинь элидхэлээ олоной анхаралда дурадхаһан байна. Энэ секциие Үбэр Байгалай хизаараар буряад соёл хүгжөөлгын түбэй захирал Сэсэг Норполова,  Агын социальна һалбариин ажалтанай мэргэжэл дээшэлүүлгын интитудай ахамад багша Цырегма Дугарова гэгшэд хүтэлэн ябуулаа.

Эндэ түбэй методистнүүд түрэл хэлэн дээрээ элидхэлнүүдые бэлдэжэ,  эдэбхитэйгээр хабаадаа. Методист Баирма Соктоева буряад дуунуудай нүлөө түрэл хэлэн, соёл, ёһо заншал үлөөн хүгжөөлгэдэ гэһэн асуудалаар элидхээ. Хандама Мункуева буряад угсаатанайнгаа “Тоонто тайлга” ёһо заншал тухай тодорхойгоор хөөрэжэ үгөө. Энэл эмхиин ветеран Цырендулма Батомункина бүхыдөө Агын Буряадай тойрог дотор буряад соёлой, арадай урлалай хүгжэлтэ тухай мэдээсэл олоной анхаралда дурадхаа. Эмхиин методистнүүд Долгорма Долгоржапова “Уран үгын шэди”,  Дулма Мункуева “Аман зохёолой гүн удха арад зоной туһада”, Эржена Цыдыпова “Алтаргана наадан - үндэр амжалтануудай эхин һабагша”, Янжима Батуева “Бурят-монгольская письменность – культурное наследие бурятского народа” гэһэн шэнжэлэлгын ажалнуудые бүтээһэн байна. Бүхы дурадхагдаһан элидхэлнүүд тус хуралдаанай дүнгөөр бэлэдхэгдэһэн тусхай номдо орохо юм.

Олоной һанамжаар, Буряадай уласхоорондын “Алтаргана” нааданда зорюулагдаһан хуралдаанай элидхэлнүүд түрэл хэлэн дээрэ бүтээгдэбэл, ехэл сэнтэй байха һэн.