Байгша оной октябриин 19-дэ  Үбэр Байгалай хизаараар  буряад соёл хүгжөөлгын түбтэ Арадай гэгээрэлэй эрхим, багшын ажалай ветеран Уржин Цыреновна Оротоватай буряад угсаатанайнгаа ёһо заншал баримталһан ехэ һонин  хөөрэлдөөн эмхидхэгдээ. 

У.Ц. Оротова 40 гаран жэлэй туршада эхин шатын ангинуудай һурагшадта  багшалһан намтартай. Наһанай амаралтада гаража, сулөө сагтаа буряад угсаатанайнгаа ёһо заншал һэргээхэ, улам хугжөөхэ хэрэгтэ горитой хубитаяа оруулдаг.

Энэ үдэрэй уулзалгада  «Хүйһэ хүндэхэ», «Тоонто тайха», «Нэрэ үгэлгэ», «Үлгыдэ оруулга»  гэхэ мэтэ элинсэгүүдһээ дамжан ерэһэн  заншалнуудые хөөрэжэ үгөө.

Энэ сэнтэй мэдээсэлнүүдынь  видео материал боложо, Үбэр Байгалай хизаараар  буряад соёл хүгжөөлгын түбэй алтан жасада материально бэшэ уг залгамжын баялигай зүйл боложо орохо түсэбтэй юм.