210  жэлэй туршада ажабайдалай түүхын хуудаһанууд ирагдажа, Агын дасанай лама санаартанда,  ая гангата Ага нютагай арад зондо, мүн холуур таран ажаһуудаг һүзэгшэдтэ золтой һайхан үдэр хүрэжэ ерэбэ.

viber 2021 09 27 11 52 58 560 copy

Агын дасанай комплексын гол дуган болохо Согшон дуганай урда тээхи талмай дээрэ 10 сагта ойн баярай еһолол эхилээ. Һайндэрые хүтэлэн ябуулагшад – Цыдендоржиев Рыгзын Цыренович болон Батомункина Цырен-Дулма Цыбиковна соелшодой дүй дүршэлтэй аха захатан Агын дасанай 190 жэлэй, 200 жэлэй ойн баярнуудые  хүтэлэн ябуулһан байна.

Агын «Дэчен Лхундублинг»  дасанай ойн баярта холо ойроһоо айлшад буугаа. Хизаарай  түлөөлэгшэд, тойрогой, аймагуудай толгойлогшонор, Ородой Уласай Буддын шажантанай заншалта сангхын дасануудай шэрээтэнэр, түлөөлэгшэд хани халуунаар амаршалаа.

Агын дасанай шэрээтын Хүндэлэлэй бэшэгээр болон гарай бэлэгүүдээр  буддын шажанай һургаал дэлгэрүүлжэ, арад зоной аша туһада оролдон ажабайдалаа түхеэрһэн тойрогой 29 эдэбхитэд шагнагдаа.

Энэ үдэр Майдариин сүмэ үүдэеэ сэлижэ, айлшад, һүзэгшэд Майдари бурхан бараалхаха аргатай байба, Буддын шажанай академи соо Агын дасанай музей экспонадуудаа дэлгэбэ.

Улаан-Үдэ хотоһоо залуу хүгжэмшэн Лудуп Очиров Агын дасанай 210 жэлдэ зорюулан бэшэһэн “Энэрхэл” гэһэн зохеолоо морин хур дээрэ гүйсэдхэжэ олондо һайшаагдаа. “Түбэргөөн” гэһэн этно-фолк бүлгэм, Агын соелой байшанай ажалшад, Доржо Дондоков, Александр Бороев ирагуу дуугаараа баяр еһолол шэмэглээ.

Ага тосхоной түб стадион дээрэ һур харбаан, бүхэ барилдаан эмхидхэгдээ, харин октябриин 2-до мори урилдаан Амидхааша һууринай ипподром дээрэ үнгэргэгдэхэ байһыень соносхогдобо.

Нарата дулаахан үдэр Агын дасанай ойн баярта сэдьхэлэй дулаахан үгэнүүд, амаршалганууд зэдэлжэ, Агын дасанай, лама санаартанай һүр һүлдэ баясан, дэбжэн байха юм.  

Үзэмтэ уулын үбэртэ

 гушан баханатай, табан алтан ганжиртай,

 холо ойро алдартай,

 хонхо ошир янзатай

амитан бүхэниие абарагша

 үбгэн Хамбаhаа үреэлтэй,

 абай хаанhаа абаралтай

алдарта сагаан дасамнай

хүгжэн, дэбжэн һалбараг лэ!

Үбэр Байгалай хизаараар буряад соел хүгжөөлгын түбэй методист Долгорма Долгоржапова.