2021 оной сентябриин 21-дэ Ага тосхоной түб талмай дээрэ Агын Буряадай тойрогто Буряад хэлэнэй фестивалиин нээлгэ баяр ёһололой оршон байдалда үнгэргэгдэһэн байна.
"Уг изагуураа дамжуулан" гэһэн гаршаг доро зохёогдоһон энэ нээлгэ Ага найман эсэгын түүхэ, ёһо заншал, эхэнэр хүнэй долоон шанар, мүн эрэ хүнэй юһэн эрдэм баримталан хүмүүжүүлгэ тайлбарилжа, ургажа ябаа залуу үетэндэ ехэ һонирхолтой, заабари заршамшье боложо үгөө.
Энэ хэмжээ ябуулга Үбэр Байгалай хизаараар буряад соёл хүжөөлгын түбэй мэргэжэлтэд зохёон эмхидхэһэн байна.
Фестиваль нээлгэдэ буддын шажанай санаартан, засаг зургаануудай, федеральна болон муниципальна эмхи зургаануудай, дээдэ болон дунда һургуулинуудай, хүүгэдэй сэсэрлигүүдэй хүтэлбэри, һургуулиин һурагшад, оюутад, олондо мэдээсэл тараадаг хэрэгсэлнүүдэй хүдэлмэрилэгшэд болон айлшад хабаадаа. Буряад хэлэнэй хүгжэлтэ тухай һанамжануудаараа хубаалдаа, эхэ хэлэмнай булаг мэтэ бурьялжа байг лэ гэжэ үреэбэд.
Зүжэглэмэл нааданда Ага найман эсэгын омог бүхэнэй түлөөлэгшэд өөрын туг дороо сугларһан байна.
Соёлой ба һуралсалай эмхи зургаануудай: «Амар сайн» театрай артистнар, Сэбэгэй Гомбожабай нэрэмжэтэ Агын үндэһэтэнэй музейн ажалтан, И.Д.Кобзоной нэрэмжэтэ үхибүүдэй уран урлалай байшанай хүмүүжэмэлнүүд ба хүгжэмөөр хангагшад, К.И.Базарсадаевай нэрэмжэтэ хүүгэдэй урлалай һургуулиин, А.Арсалановай нэрэмжэтэ хүүгэдэй урлалай һургуулиин хүмүүжэмэлнүүд, Агын аймагай Соёлой байшанай ажалтан, Агын ДалиТЭ театрай артистнар, Б.Ринчиногой нэрэмжэтэ Агын багшанарай колледжын оюутад эдэбхитэйгээр хабаадаа.
Анда нүхэдэй хани дулаахан харилсаагаар Шэтэ хотоһоо айлшаар бууһан "Забайкальские казаки" ансамблиин артистнар фестивалиин нээлгэ гоёон шэмэглэһэн байна.
Фестивалиин нээлгын баяр ёһолол Татьяна Бальжинимаева, Дылгыр Ирдынеев хоёр урматай зохидоор хүтэлэн ябуулаа.
Һайндэрэй үедэ уран урлалай яармаг эмхидхэгдээ, һонирхолтой кроссворднууд зондо дурадхагдаа, монгол бэшэгэй каллиграфяар, шагай наадаар мастер классууд үнгэргэгдөө.
Энэ үдэрһөө һарын туршада Буряад хэлэнэй фестивалиин хугасаа соо тойрог дотор элдэб һонин мүрысөөнүүд эмхидхэгдэхэ: шүлэгэй, дуунай, зүжэгэй, ёохорой, мүн тамирай хэмжээ ябуулганууд олоной анхарал татаха байна.
Октябриин 20-до “Буряад хэлэн: түүхэ ба мүнөө үе саг” гэһэн нютаг оронууд хоорондын эрдэмэй-дүршэл ололгын конференци үнгэргэгдэжэ, Агын Буряадай тойрогто Буряад хэлэнэй фестиваль түгэсэхэ юм.
Д.Долгоржапова, Үбэр Байгалай хизаараар буряад соёл хүгжөөлгын түбэй методист.