2021 оной апрелиин 7–до Агын Буряадай тойрогой Захиргаанда Буряадай уласхоорондын «Алтаргана-2020» нааданай эмхидхэлэй хорооной дэлгэрэнгы суглаан үнгэргэгдэбэ. Тэрэнэй хугасаа соо нааданда зорюулагдаһан дуунай премьера, шангуудай болон нааданай һахюуһан болохо Шоно Шадамар Шадабай презентаци эмхидхэгдээ.
Агын тойрогой захиргаанай захяагаар зохёоһон “Алтаргана” гэһэн уран һайхан дуугаа Ага нютагай Согто-Хангил нютагта тоонтотой буряад арадай элитэ композитор, дуушан Дулма Сунрапова олоной анхаралда дурадхаба. Дууень “Амар Сайн” театрай хатаршад шэмэглээ.
Нааданай шангуудые Ага нютагай уран бэлигтэн Жигжит Баясхаланов Санкт-Петербург хотодо мастерской соогоо зохёон бүтээһэн байна. Дүн хамта 15 кубогууд соёлой болон тамирай мүрысөөнүүдэй Гран-при эзэлһэн абаргануудта барюулагдаха. Тус шан хадаа өөрын онсо маягаар бүтээгдэһэн, хуша модон ордон соо хадагалаатай байха юм. 434 алтан, мүнгэн ба хүлэр медальнууд буряад хүнэй зүүгөөд ябадаг гуу мэтэ түхэлтэй байхаһаа гадна, хабхагынь нээгдэдэг, зүүдэг ооһорынь - Үбэр Байгалай хизаарай тугай үнгэтэй юм. 440 алтан, мүнгэн болон хүлэр дипломууд хадаа модон гадартай, үгэнүүдынь тусхай шудхамал түмэр дээрэ онсо шэрээр һиилэн бэшээтэй. Шангуудай нэгэ нэгэ комплектнуудые Агын соёлой байшанай мэргэжэлтэд Ага нютагай мэдээжэ модельер Руслан Батожаргаловай оёһон хубсаһа үмдэн харуулба. Иимэ хубсаһа тамирай мүрысөөнэй шүүгшэд үмдэхэ юм.
Ямаршье ехэ наадан, мүрысөөнүүд өөрын онсо һахюуһантай байдаг. Буряадай уласхоорондын «Алтаргана-2020» нааданай һахюуһан - Шадамар Шадаб. Үбэр Байгалай хизаараар буряад соёл хүгжөөлгын түбэй мэргэжэлтэд нааданай һахюуһанай презентаци бэлдэхэдээ, Шонодо Шадамар Шадаб гэжэ нэрэ олгуулһан байха юм. Энэ дүрые ДалиТЭ театрай артист Зоригто Цыбиков шадамар бэрхээр харуулжа, олоной һайшаалда хүртөө.
Презентациин эсэстэ бүгэдэ хабаадагшад Шадамар Шадабай урилгаар ёохор хатарай дүхэригтэ нэгэдэһэн байна. Мүн нааданай һахюуһанай дэргэдэ дүрэ зурагаа буулгажа, мүнөөдэрэй түүхэтэ хэмжээ ябуулга мүнхэлбэ.