Мүнөөдэр, февралиин 2-то, Улаан-Үдэ хотодо гүнзэгы удхатай, холые хараалһан хэмжээ ябуулга – Бүгэдэ буряадай үндэһэн соелой эблэлэй хуралдаан үнгэргэгдэжэ байна. Үбэр Байгалай хизаарай түлөөлэгшэдэй тоодо Үбэр Байгалай хизаараар буряад соел хүгжөөлгын түбэй захирал Сэсэг Норполова эдэбхитэй хабаадана.
Аяар холын 1991 ондо байгуулагдаһан ниитэ эмхи хаа хаанагүй ажаһуужа байһан буряадаа нэгэдүүлхэ, арадаа бүрин бүтэн үлөөхэ, элинсэг хулинсагайнгаа еһо заншал, үндэһэн соелоо, хэлэ бэшэгээ хүгжөөн дэлгэрүүлхэ хэрэгтэ горитой үүргэ дүүргэхэ уялгатай.
Үбэр Байгалай хизаараар буряад соел хүгжөөлгын түб тойрог дотор, мүн бүхыдөө хизаарай дэбисхэр дээрэ үндэһэн хэлэеэ үлөөхэ, хүгжөөхэ хэрэгтэ горитой анхарал хандуулдаг. Эхын һүөөр шэнгээгдэһэн жэнхэни һайхан хэлэеэ алдангүй, “би буряадби” гэжэ омогорхожо ябаха залуу үетэниие хүмүүжүүлхэ зорилготойгоор бүри бага наһанай үхибүүдһээ эхилээд, бүдүүн зоной дунда зохеохы мүрысөөнүүд, уулзалганууд, нааданууд буряад хэлэн дээрэ амжалтатай үнгэргэгдэдэг.
Хэлэнтэй хамта соел, урлал, арадай баялиг хүгжэнэ, араднай гадаадын нүлөөдэ оронгүй, арад шэгтээ, бүрин бүтэн үлэнэ. Хэр угһаа дамжан ерэһэн баялигаа наринаар сэгнэдэг хүн Эхэ орондоо дуратайгаар хүмүүжэнэ, ондоо арадуудта хүндэтэйгөөр хандажа һурана - эдэ бүгэдэ харагдашагүй утаһаар холбоотой ха юм.
Росси гүрэн дотор хэды арад ажаһуунаб, булта мүнөө эрэлхэг зоригтойгоор, баатаршалга гарган, хүлөө шоройдоһон нютагаа, гүрэн түрэеэ хархис дайсадһаа хамгаалжа байна. Өөрынгөө, үбгэ эсэгэнэрэйнгээ, нютаг оронойнгоо нэрэ дээшэнь үргэжэ, дайнай газарта ами наһаяа гамнагүй хэды олон буряад хүбүүднай сухарингүй ябанаб. Агымнай хүбүүд Балдан Цыдыпов, Эдуард Норполов, Дашибал Мункожаргалов – эдэнэй Ородой Уласай Баатарай мүшэд бүхы нютагаархидтамнай ялас гэмэ гэрэлээр туяараа ха юм.
- Мүнөөдэр энэ хэмжээ ябуулгада арадайнгаа хүгжэлтын гол хараа бодол зүбшэн хэлсэхэ, ВАРК-ын шэнэ юрэнхылэгшые, зүблэлэйнь гэшүүдые һунгаха хэрэгтэ хабаадажа байһандаа баяртайб. Арад олон түмэнэйнгөө арюун һүлдыень дээшэнь үргэн ябахамнай болтогой! - гээд С.Ж.Норполова тэмдэглэнэ.
