Будда бурханай номнол һургаал болохо бурхан шажанай Буряад орондомнай залархада, түбэд үндэһэтэй «Тэнгэри» гэһэн удхатай табан үнгын нангин хадагууд бии болоhон түүхэтэй. Монгол туургата буряад зоной бэлэгэй дээдын бэлэг, дээдэ зоноо хүндэлдэг хүндын тэмдэг болоһон, дайдын эзэдтэ үргэдэг табан үнгын хадаг айл бүхэндэ сахигдан, һайхан һанаа дэлгэрүүлжэ, хүнэй hүp hүлдэ үргэдэг. Буурал холын үе carhaa буряад угсаата зоной хүндэтэ айлшадаа золгожо, хадаг баридаг заншал бии, бурханда хадаг табижа, бэриие гуйдаг ёhолол бии.

Хадаг өөрын нэрэтэй, үнгэтэй, хээтэй байдаг.

Сагаан үнгэтэй хадаг Бодисадын сэбэр сэдьхэл, буян хэшэг гэгдэжэ, арбан сагаан буян арьбажуулхын тэмдэг болоно. Сагаан хадаг Номын Багшада баридаг.

Хүхэ үнгэтэй хадаг ехэ үлзытэй. Хүхэ Мүнхэ Тэнгэри шэнги энхэ тайбан амгалан байдалай заха хизааргүй байлгын мэдэрэл түрүүлдэг. Сэнхир хүхэ хадагые лама санаартанда үргэхэһөө гадна, тэнгэриин олон бурхадта үргэл болодог.  

Улаан хадаг гал дүлэнэй, урин дулаанай тэмдэг. Гуламтын галай залирангүй бадаржа, yrhaa угта дамжан дэгжэхэ гэһэн удхатай. Улаан хадаг гал гуламтаяа тахюулхадаа, наһанай заһал бүтээхэдээ, hүp һүлдэеэ дуудуулхадаа хэрэглэдэг.

Ногоон үнгэтэй хадаг ургамалай тэмдэг, ургасын дэлгэрэн арьбажахын, үрэжэхын, үндэр баян ургасын удхатай.

Шара хадаг шаргал наранай үнгэтэй. Шара малгайтанай шажан мүргэлэй дэгжэхын үлзы тэмдэг. Шара хадаг муу юумэнһээ, элдэб баршадһаа зайсахын тула хэрэглэдэг.