Эртэ урда сагһаа хойшо аглаг һайхан Ага нютагнай мүнгэн хоолойтой дуушадаар, хурдан моритой солошодоор, уран гартай дархашуулаар болон бэшэшье бэлиг ехэтэй, бэрхэ шадамар хүнүүдээр баян. Үни холоһоо ерэһэн заншалаа үргэлжэлүүлжэ, улам дамжуулжа байһан талаан бэлигтэйшүүлэй нэгэн болохо нарин дархан Зорикто Дариев тухай зураглал.

Зорикто Дариев 1983 оной мартын 30-да Агын аймагай Хүнхэр нютагай Хурса Хутагата Худанса Шарайд омогой  Дариев Мижитдоржын гэр бүлэдэ одхон хүбүүн боложо түрэһэн намтартай.

1989 ондо Зорикто хүбүүн тоонто нютагайнгаа дунда һургуулиин богоһо алхажа, эрдэм бэлигтэй танилсажа эхилээ. Бүри бага наһанһаа зураха ехэ дуратай байһан. Сэдьхэлдэнь һайшаагдаһан юумэ харахадаа, тон адлиханаар зуража, түрэлхидөө болон нүхэдөө гайхуулдаг һэн. Хүнхэрэйнгөө дунда һургуулиин 9-дэхи анги дүүргээд, зураха талаан бэлигээ дээшэлүүлжэ,1998 ондо Улаан-Үдын барилгын ба хотын ажахын техникумай уран һайханай шэрдэлгын, һэльбэн шэнэлэлэлгын мэргэжэл шудалжа, 2001 ондо амжалтатай түгэсхөө.

Хорёодхон наһа хүсөөгүй ябаһан Зорикто түрэл нютагаа бусажа, ажалайнгаа намтар эхилһэн байна. Уран гартан Гармажапов Цыбен ахайн ударидалга доро алта, мүнгэ хайлуулжа, тон түрүүшынхеэ эхэнэрэй гэнжэ урлан бүтээһэн. Тэрэ сагһаа хойшо нарин ажалаа улам мүлижэ, элдэб гоё буряад угалзануудтай һиихэ, дэнзэ, бэһэлиг гэхэ мэтэ зүүдхэлнүүдые бүтөөжэ, нютагайхинаа баясуулжа эхилээ. 

- Мүнөө сагта ажаһуугшад гол түлэб буряад заншалта хубсаһанай шэмэг болохо гоёолтонуудые захидаг болоо, - гээд, уран гартан тэмдэглэнэ, - энэ ехэ харюусалгатай ажал, тиибэшье хүнэй захил саг соонь, шанартайгаар бүтээхые оролдодогби, - гээд үргэлжэлүүлнэ.

  “Нагасын тэнгэри ехэ” гээд буряад арад хэлсэдэг. Зорикто Дариевай урлаха шадабари нагаса талаһаа ерэһэн.

Мүнөө Наталья нүхэртэеэ гурбан һайхан үринэрые үндылгэнэ, гэр бүлөөрөө Ага тосхондо амгалан тэнюун ажаһууна. Саашадаа дүй дүршэлөө улам хүгжөөжэ, уран дархашуулай харалга-мүрысөөнүүдтэ эдэбхитэйгээр хабаадажа, талаан бэлигээрээ суурхахыень хүсэнэбди!