Ага тойрог дотор 10 арадай театрнуудай болон 18 драмын бүлгэмүүдэй хоорондо жэл бүри Даширабдан Батожабайн нэрэмжэтэ мүрысөөн үнгэргэгдэдэг. Эндэ жэл бүри мүрысөөндэ эдэбхитэй хабаададаг театрай талаан бэлигтэндэ буряад хэлэн дээрэ бэшэгдэһэн зүжэгүүд хомор болонхой. Тиимэ ушарһаа мүнөө жэл эгээл түрүүшынхиеэ тойрог дотор зүжэг бэшэхэ зонуудаа элирүүлэн, хэжэ байһан ажалтайнь танилсаха, тойрогой театрнуудта, драмын бүлгэмүүдтэ бэшэһэн бүтөөлнүүдыень дурадхаха зорилготой буряад хэлэн дээрэ зүжэгүүдые бэшэгшэдэй мүрысөөн эмхидхэгдээ.
Байгша оной сентябриин 18-һаа октябриин 2 болотор буряад хэлэн дээрэ зүжэг бэшэлгын мүрысөөндэ 13 зүжэгүүдэй мэдүүлгэ 9 зохеолшодhоо ороо, октябриин 5-да дүн гаргагдажа, илагшад элирбэ:
- 1 шатын Лауреадай Диплом - Долгорма Долгоржапова , “Ород басаган”, ород буряад арадай хани барисаан тухай мелодрама;
2. 2 шатын Лауреадай Диплом - Цындыма Бабуева, “Гурбан харгын бэлшэртэ”, дайнай үедэ болоһон ушар дээрэһээ уламжалан бэшэһэн зүжэг;
3. 3 шатын Лауреадай Диплом Баир Дугаржапов , “ Жаргал ба зоболон”, буддын шажантанай һургаал заабариин үндэһэтэй зохеол;
4. 3 шатын Лауреадай Диплом - Светлана Махабадарова, “ Бугаалин буурал эжы”, бөө шажантанай еһолол зураглагдана.
Бэшэ хабаадагшадта Үбэр байгалай хизаараар буряад соел хүгжөөлгын түбэй зуг hөө баярай бэшэгүүд барюулагдаба:
5. Баяндалай Доржиев, Догой нютагай соелой ветеран. Даширабдан Батожабайн “Төөригдэһэн хуби заяан” гэһэн роман зүжэгэй хэлэн дээрэ болгожо, ехэхэн ажал бүтөөбэ.
6. Элбэг Зандраев, залуу уран бэлигтэн. Фантасмагори гэһэн жанр соо “Амиды түлеэн” гэжэ ехэ һонирхолтой зураглал бэшээ.
7. Цыбигмит Багдаева, Ага тойрогоймнай мэдээжэ поэтесса, “Губаар сохиһон гушаад жэлнүүд” гэжэ хүнэй зүрхэ сэдьхэл хүдэлгэмэ драма , үнэн болоһон ушар дээрэһээ бэшээ;
8. Любовь Батожаргалова, багша мэргэжэлтэй, үхибүүдэй номой автор, “Саг үбгэн” гэһэн зохеолоо эгээл жаахан сэсэрлигэй үхибүүдтэ зорюулба;
9. Бадма-Ханда Загдаевна, тойрогой мэдээжэ соелшодой нэгэн, Хила нютагай “Улаалзай” гэһэн аман зохеолой бүлгэмэй эмхидхэгшэ, хүтэлбэрилэгшэ. “Гран-При” гэһэн юрын нютагай басаганай соелой үндэр тээшэ орео харгы харуулһан зүжэг бэшэбэ.
Соносхогдоhон мүрысөөн зүжэг бэшэхэ бэлигтэй уран гуурhатаниие элирүүлбэ, энэ бэшэһэн зүжэгүүдыень суглуулбари болгожо хэблэгдээд, хүдөө hууринуудай драмын бүлгэмүүдтэ дурадхагдаха. Буряад хэлэн дээрэ пьесэнүүдые бэшэгшэдтэй түхэреэн шэрээ эмхидхэгдэжэ, саашадаа яажа буряадаар зүбөөр зүжэг гээшые бэшэхэб, гэжэ хөөрэлдөөн, семинар хэгдэхээр гэжэ хараалагдаба.
