Россиин Федерациин Гүрэнэй Тугай үдэр жэл бүри августын 22-да Россида тэмдэглэгдэдэг.
Россиин туг 1994 оной августын 20-ой үдэр Юрэнхылэгшын «О Дне Государственного флага Российской Федерации» гэhэн зарлигаар байгуулагдаhан. Энэ үдэр 1991 ондо РСФСР-эй Верховно зүблэл «Об официальном признании и использовании Национального флага РСФСР» гэhэн тогтоол гаргаа.
Россиин Федерациин гурбан үнгэтэ туг гурбан зуун жэлэй түүхэтэй юм. Тэрэ XVII-XVIII-дахи зуун жэлнүүдэй уулзуурта бии болоhон юм. I-дэхи Пётр хаанай аба Алексей Михайловичай хаан засаг бариха үедэ сагаан, хүхэ, улаан үнгэтэй, хоёр тархитай бүргэдтэй туг эгээ түрүүшынхеэ сэрэгэй «Орёл» гэhэн корабль дээрэ бодхоогдоhон байна.
Гурбан үнгэтэ тугые байгуулха тухай I-дэхи Пётр хаан үүсхэhэн юм. 1705 оной январиин 20-до I-дэхи Пётр хаан наймаатай онгосонууд дээрэ сагаан, хүхэ, улаан туг бодхоодог байха тухай зарлиг гаргаhан юм. Тиигэжэ тэрэ өөрөө тугай хэб зураhан байна. Хожомынь Россиин уг хара, шара, сагаан үнгэтэйшье болгогдоhон байгаа.
Тэрэнэй hүлээр 1868 ондо II-дохи Николай хаанай хаан шэрээ эзэлхэ үедэ баhа сагаан, хүхэ, улаан туг дахинаа Гүрэнэй Туг гээд баталагдаhан юм. Тугай үнгэ бүхэн өөр өөрын удхатай байhан:
улаан – гүрэнэй hүр hүлдэ;
хүхэ - Богоматерь бурханиие;
сагаан – эрхэ сүлөө hүлдэлнэ.
2000 оной декабриин 25-да Россиин Федерациин Юрэнхылэгшэ В.В. Путин «О Государственном флаге Российской Федерации» гэhэн Федеральна Хуулида гараа табиhан байна. Тэрэ Хуулиин ёhоор Гүрэнэй
Туг сэхэ булантай бүдөөр оёгдонхой, гурбан адли зуруудhаа бүридэнэ. Дээдэ зуруудынь – сагаан, дундахинь – хүхэ, дорохинь – улаан үнгэнүүдтэй.
Гүрэнэй Туг гүйсэдхэхы засаг зургаанай, Федеральна зургаануудай гэхэ мэтэ байшанууд дээрэ тодхогдодог.
2022 оной сентябриин 1-hээ Россиин hургуули бүхэндэ долоон хоногой эхиндэ гүрэнэй гимн доро Россиин Федерациин туг бодхоогдодог болохо юм. Россиин Федерациин hуралсалай министр Сергей Кравцовай хэлэhээр hургуулинуудта туг бодхоохо заншал Эхэ орондоо дуратайгаар, гражданска харюусалгатайгаар үхибүүдые хүмүүжүүлхэдэ туhатай.
Россиин Тугай hайндэрөөр!
Гурбан үнгэтэ тугнай hэбшээндэ намилзажа, арад зондо эб найрамдал асараг лэ!
